Гавьяат жүжигчин Д.Сосорбарамын санаачлан, зохион байгуулж буй “Монгол” язгуур урлагийн нэгдсэн тоглолт энэ сарын 18, 19-нд Монголын Үйлдвэрчний соёлын төв ордонд болох гэнэ. Энэхүү тоглолтынхоо талаар өнөөдөр мэдээлэл хийлээ. Тус тоглолт нь ардын урлагийн таван шилдэг хамтлагийн нэгдсэн тоглолт юм. Ардын урлагийн өөр, өөр урсгалаар уран бүтээлээ туурвидаг “Арга билэг”, “Домог”, “Хөсөгтөн”, “Жонон”, “Алтан Ураг” гэх таван хамтлагийн хамтарсан “Монгол” язгуур урлагийн нэгдсэн тоглолтын тасалбар нь 25000 төгрөг гэнэ.

“Алтан Ураг” хамтлаг нь рок хөгжмийг ардын урлагтай хослуулан тоглодог бол “Домог” хамтлаг ардын уламжлалт аялгууг модерн шинэ хөгжмийн стильд оруулан тоглодог. Харин “Арга билэг” хамтлаг нь морин хуур, ятга хөгжмийг этно жазз стилиэр тоглож, “Хөсөгтөн” хамтлаг нь хөөмийд тулгуурлан, “Жонон” хамтлаг үндэсний хөгжмийг орчин үеийн поп хэмнэлтэй хослуулан тоглодог өөрсдийн гэсэн онцлогтой хамтлагууд юм. Дээрх таван хамтлаг хамтран Монгол ардын урлагийн шинэчлэл, уламжлалт хөг аялгуу, хөөмий, морин хуурын гайхамшгийг мэдрүүлэх юм байна. Сонирхуулахад энэхүү тоглолт нь Монгол Улсын Ерөнхийлөгчийн ивээл дор болж байгаа юм.