Монгол Улсаас Финланд Улсад суух Онц бөгөөд Бүрэн эрхт Элчин сайд Б.Энхмандах энэ сарын 8-ны өдөр Финланд Улсын Ерөнхийлөгч, Хатагтай Таръя Каарина Халоненд Итгэмжлэх жуух бичгээ барив.

Итгэмжлэх жуух бичиг  барьсны дараа Ерөнхийлөгч Т. Халонен, Элчин сайд Б.Энхмандах нар хоёр орны харилцаа, хамтын ажиллагааны талаар найрсгаар ярилцаж,  санал солилцов.

Элчин сайд Б. Энхмандах Монгол Улсын Ерөнхийлөгч Ц.Элбэгдоржийн мэндчилгээг Финландын Ерөнхийлөгчид уламжилж, Ерөнхийлөгч Т.Халонен Монголд айлчлах урилгатайг нотлон, тааламжтай цагтаа Монголд айлчлахыг урив. Чингэхдээ 2011 он нь Монгол Улс, Монголын ард түмний хувьд онцгой жил- Ардын хувьсгалын 90 жилийн ойн баярын жил болохыг тэмдэглэж, энэ үеэр айлчилбал тун зохистой гэж үзэж байгаагаа илэрхийлэв.

Ерөнхийлөгч Т.Халонен урилгыг баяртай хүлээн авч байгаагаа илэрхийлээд, Монгол Улсын Ерөнхийлөгчийг ирэх намар Финланд улсад айлчлуулах асуудлыг нааштайгаар шийдвэрлэхээр ажиллаж байгаагаа мэдэгдэв.

Монгол Улс Скандинавт Элчин сайдын яамаа нээсэн нь хоёр улсын харилцаа, хамтын ажиллагааг улам өргөжүүлэн хөгжүүлэхэд чухал хүчин зүйл болно гэж үзэж байгаагаа Элчин сайд мэдэгдэж, хоёр орон хамтарч ажиллаж болох зарим тодорхой салбарын талаар саналаа илэрхийлэв.

Ерөнхийлөгч Т.Халонен Финланд Улс, Монгол Улс хоёр уул уурхай, ХАА зэрэг олон салбарт хамтран ажиллах боломжтой талаар Элчин сайдтай санал нэг байгаагаа илэрхийлэв.

Элчин сайд Б. Энхмандах хоёр орны найрамдалт харилцаа, хамтын ажиллагааг өргөжүүлэн хөгжүүлэхийн төлөө ажиллахаа илэрхийлэв.

Г.Дарь