Монгол Улсын Ерөнхийлөгч Ц.Элбэг­дорж зангарагтай, хүчтэй улстөрч гэдгээ харууллаа. Тэрбээр Ардын нам, Ардчилсан намынхан гэлтгүй зэмлэх үедээ зэмлэж, ха­туухан үг хэл­чихдэг. Энэ удаа ч тэр зангаа тавьсангүй. Ерөнхийлөгч Ерөнхий сайд С.Батболдын танхимын шинэ сайд нарт “муу” үнэлгээ тавьсан. Ялангуяа УИХ-ын гишүүн Д.Хаянхярвааг Хонгор суманд ажиллахыг даалгаж, Ц.Дашдоржийг өөр­тэйгээ хамт Өмнөговьт ажил­лахыг сануулсан. Бас болоогүй, Ерөн­хий сайдыг яа­ран шийдвэр гаргахгүй байхыг анхааруулж, “Хэв­лэлээр ажил хийх хэрэггүй” гэж захисаар Өмнөговийг зорьсон. Гэвч Ардын намынхан түүний үгэнд оролгүй шинэ сайд нарыг томилох асуудлаар саналаа ирүүлэхийг да­хин хүссэн юм. Үүний хариуд Ерөнхийлөгч Ц.Элбэгдорж “Өмнө нь хэлж байсанчлан Зас­гийн газрын гишүүнд УИХ-ын гишүүн бус хүнийг нэр дэв­шүүлэх нь зүйтэй. Иймээс Д.Цогтбаатар, Н.Хүрэлбаатар нарыг Засгийн газрын гишүүн, сайдаар томилуулахыг дэмжиж байна” гэв. Ямартай ч тэрбээр хоёр дахь удаагаа С.Батболдын саналыг эс зөвшөөрлөө. Түүнчлэн Тэргүүн шадар сайдын суудал байх шаардлагагүй гэж үзэж буй. Гэсэн ч түүний энэ үгийг эрх барьж буй намын удирдлагууд чихнийхээ хажуугаар өнгөрөөсөөр байгаа. Ийн зөрсөн ч Ерөнхийлөгчийн үзэл бодол өөрчлөгдөхгүй биз ээ. Төрийн тэргүүн үүгээр үзэл бодолдоо хэр үнэнч болохоо олон нийтэд таниулж, мэдрүүлж, хамгийн гол нь ялгарч чадлаа.