Аль Жалифагийн үе залгамжилсан хаант засаглалын эсрэг тус оронд улам бүр эрч хүчээ авч буй эсэргүүцлийн жагсаал цуглааныг зогсоож, хэв журам сэргээн тогтооход туслахаар Саудын Арабын цэргүүд Бахрейны хаант улсын хүсэлтээр  тус улсын нутаг дэвсгэрт нэвтрэн орж эхэлснийг сөрөг хүчний зүгээс “гадаадын түрэмгийлэн эзлэлт эхэллээ” гэж шүүмжилж эхэлсэн байна.

“Далайн тохойн бамбай” хэмээн нэрлэдэг Булангийн орнуудын цэргийн хамтын ажиллагааны Зөвлөлд саудын арабын цэргүүд оролцдог бөгөөд телевизийн нэвтрүүлгээр Саудын Арабын цэргийн машин техник, цэргүүд Бахрейний нутаг руу нэвтрэн орж эхэлснийг харуулсан байна.

Бахрейний эрх баригчид “Ард иргэд, оршин суугчид, дэд бүтцийн чухал объектуудын аюулгүй байдлыг сахин хамгаалахаар “Далайн тохойн бамбай”-гийн зэвсэгт хүчин тус оронд хүрэлцэн ирж буйг мэдээлээд ард иргэдийг “бүрэн дүүрэн хамтран ажиллахыг” уриалсан байна.

Эмиратын гадаад харилцааны сайд Абдала бен Зайед Парис хотод “Нийгмийн хэв журмыг сэргээн тогтоох ажилд туслахаар Саудын Араб  “500 цагдаа” илгээснийг мэдээлсэн ажээ.