Өнгөрсөн онд эдийн засгийн салбарт өрнөсөн, олны анхаарлыг татсан нэгэн асуудал Монголын Хөрөнгийн биржийг удирдах менежментийн багаар гадаадын компанийг сонгон шалгаруулах ажил байлаа. 2011 он гарахын өмнөхөн буюу 2010 оны арванхоёрдугаар сарын 30-нд Монголын хөрөнгийн биржийн үйл ажиллагааг олон улсын төвшинд хүргэхэд Лондонгийн хөрөнгийн биржтэй хамтран ажиллах тухай гэрээнд Төрийн өмчийн хороо гарын үсэг зурсан  юм. Ингэснээр  Монголын хөрөнгийн зах зээл үсрэнгүй хөгжилд хүрэх, Монголын компаниуд Лондонгийн биржээс мөнгө босгох боломж бүрдэх бөгөөд гадаадын хэвлэлүүд ч Англи, Монголын хамтын түншлэлийг анхааралтай ажиглаж байгаа бололтой.  Гуравдугаар сарын 2-3-ны өдөр болсон эдийн засгийн чуулганаар олны сонирхлыг хамгийн их татсан нэгэн сэдэв бол хөрөнгийн зах зээл байв.  Нэг хэсэг унтарсан Монголын хөрөнгийн зах зээл гэнэт сэрсэн нь Тавантолгой хэмээх их баялагтай  ч холбоотой  билээ. “Эрдэнэс Тавантолгой” компанийн хувьцааг олон улсын хөрөнгийн зах зээлд гаргахтай зэрэгцэн лондончууд Монголын хөрөнгийн зах зээлд цоо шинэ төрхийг авчрахаар амлаад байна. Үүнтэй зэрэгцээд тэдний тухай мэдээлэл гадаадын хэвлэлийн агентлагуудын сонирхлыг татаж эхэлжээ.

“Minegolia independent media” сайтад Лондонгийн үнэт цаасны биржийн тэргүүн Монголын хөрөнгийн биржийн тэргүүн болно хэмээн мэдээлсэн байна.  Түүнчлэн Лондонгоос 60 хүний бүрэлдэхүүнтэй хүчирхэг баг Монголын хөрөнгийн зах зээлийг босгох тоглолт хийх тухай уг сайтад тэмдэглэжээ. Энэ талаар Монголын хөрөнгийн биржийн гүйцэтгэх захирлын үүрэг гүйцэтгэгч Х.Алтайгаас тодруулахад Монголын хөрөнгийн биржийн тэргүүнээр хэнийг сонгохоо одоогоор товлоогүй байгаа гээд Лондонгийн талаас удирдлагыг гартаа авах яриаг  үгүйсгэсэнгүй. Түүнийхээр хоёр тал энэ асуудлыг одоогоор хэлэлцэж байгаа гэнэ. Харин 60 хүнтэй Лондонгийн  хөрөнгийн биржийн өргөн багийн Улаанбаатарт айлчлах мэдээг “батлагдаагүй яриа” хэмээн Х.Алтай захирал үгүйсгэлээ. Тэрбум, тэрбумаар хэмжигдэх, сая сая доллараар үнэлэгдэж буй Тавантолгой  коксжих нүүрсний орд 30 жилийн настай Монголын хөрөнгийн биржид ололт амжилт, хөгжил дэвшил авчрах хөшүүрэг нь болж байгаа бөгөөд лондончуудад хөрөнгийн зах зээлд тоглолт хийх эрх өгөх нь эргээд манай улсын эдийн засагт ашиг, аж ахуйн нэгжүүдэд алдар нэр авчрах ажээ. Учир нь Монголын компаниуд дотоодынхоо зах зээлээс олигтойхон мөнгө босгох боломж муу. Өөрөөр хэлбэл, манайх хөрөнгийн зах зээл дээрх “худалдан авагч”, хөрөнгө оруулагчид балчирдаж өнөөхөндөө Монголын компаниудын хувьд  дотоодынхоо хөрөнгийн зах зээлээс ашиг хүртэх бололцоог хязгаарлаж буй. Тиймээс үндэсний компаниудад олон улсын хөрөнгийн зах зээлд хөл тавихад Лондонгийн хөрөнгийн биржийн түншлэл томоохон түлхэц болно хэмээн Төрийн өмчийн хорооныхон үзэж байгаа юм байна. Гэрээнд зааснаар эхний ээлжинд лондончууд Монголын хөрөнгийн биржийн удирдлагыг гартаа авах магадлал өндөр байгаа аж. Тэдний зүгээс ч ийм хүсэлт Төрийн өмчийн хорооны удирдлагуудад тавиад байгаа гэх. Тэгэхээр “Minegolia independent media” сайтад тавигдсан мэдээлэл ор тас худлаа сенсааци ч бас биш бололтой.