![](https://news.mn/wp-content/archive2/news/photo/2011/3/340638c32ada4cd4/b7a2415cfde6eafdbig.jpg)
Хуультай холбоотой олон хэлц, зүйр үгс бий. Хамгийн түгээмэл нь “Монголын хууль гурав хоног”, “хуулийг гууль болгох”, “хуулийн цоорхой” гэх мэт. Аль болохоор л хуулийг баримтлахгүй байх, түүнээс зайлсхийх гэсэн төрөлхийн гэмээр араншин монголчуудад маш хүчтэй илэрдэг.
Нууц товчоонд дурьдсанаар Чингис хаан гавьяа байгуулсан өрлөг, шадруудаа “… тооны гэмийг өршөөх” гэсэн агуулгатай шагналаар шагнадаг байж. Хийсэн гэм нүглийнх нь төлөө биш, хийж магадгүй алдаа дутагдлынх нь төлөө өршөөх, бүр тоо заагаад урьдчилаад хэлтрүүлэх ийм төрлийн шагналыг эрх зүйн зохицуулалттай өөр ямар ч улсын түүхээс олж уншихгүй байх аа даа.
Манай Чингис хаанаас хамаагүй өмнө, манай эриний өмнөх 439 онд эртний Ромд баталсан “12 хүснэгтийн хууль” гэж алдартай хууль бий. Энэ хуулиар хөршийн чинь талбайд ургасан мод танайхыг сүүдэрлэвэл яаж шийдэх, иргэд хоорондын эд хөрөнгийн маргааныг хэрхэн шийдвэрлэх, эр нөхөртэй байж бусадтай завхайрсан эмэгтэй гэж хэнийг хэлэх вэ гэх мэтчилэн маш нарийн харилцааг хуульчсан мөртлөө урьдчилаад өршөөх тухай юу ч байхгүй л байгаа юм.
Гэхдээ монголчуудад өөр ямар ч үндэстнээс илүүтэйгээр хууль зарлигийг дагаж ирсэн түүх бий. Чингис болон түүний хөвгүүдийн байлдан дагууллын үед зуны цагт газар хөндсөн, бэлчээрийг зориуд шатаасан, ус голыг бохирдуулсан этгээдийг цаазаар авч, бусад олон орны хууль зүйн системд нөлөөлсөн алдарт “Их засаг” хуулийг даган мөрдүүлж байв. Элчийг хамгаалж, дипломат ёсыг хөгжүүлэн, худалдаа наймааг өргөжүүлэн амар амгаланг сахиулж байсан аугаа түүх зөвхөн хэн нэгэн ухаантан хааны зарлиг, тушаал төдийгөөр явж байсан байж таарахгүй. Хэлбэрэлтгүй мөрдөгддөг, зохицуулалт сайтай сайн хууль байж гэмээнэ хэрэгжих учиртай.
Социализмын эхэн үед гадаадын, гадаад ч гэж дээ оросуудын шууд тулгасан хууль тогтоомжуудыг орчуулаад л хэрэглэж эхэлсэн. Данзан тэргүүтэй сэхээтнүүд өөрсдийн хүсч байгаа нийгмийг байгуулахад эдгээр нь огт таарахгүй гэдгийг анзаарч, шүүмжилж байсан боловч удалгүй хороогдсоноор манай хуулиудын хувь заяа оросуудаас бүрэн хамааралтай болсон. Шүүхийн шийдвэргүйгээр хэдэн мянгаар нь буудаж болоод байхад юун тэр хууль манатай.
Нэг намаас, үзэл сурталаас, хэсэг бүлэг хүмүүсээс хамааралтай нийгэмд хууль боловсронгуй байх, олон төрлийн хуультай байх, дэлхийн жишигт нийцэх, төрт ёсны түүхэн уламжлалыг хадгалах зэрэг асуудал огтхон ч падгүй. Хотоос “75-ын” гутал аваад хөдөө 100 төгрөгөөр зарчихвал дамын наймаа хийсэн хэргээр шийтгүүлэх мөртлөө албан тушаалынхаа сүр хүчээр бусдын эрхийг зөрчих нь хэвийн үзэгдэл болсон социализмын он жилүүдэд Б.Чимид, Ж.Амарсанаа тэргүүтэй манай нэртэй хуульчид төрөн гарсан. Тэд 1990-ээд оны эхэн үед ардчилсан нийгмийн хууль тогтоомжын загвар ямар байх ёстойг тодорхойлж, шинэтгэлийн үндсийг тавьсан нь тун гайхалтай явдал юм.
Шинэтгэл гэснээс манай энэ дуусдаггүй эрх зүйн шинэтгэл бусад олон салбарын хөгжлийг чөдөрлөж байна. Бүр сүүлдээ иргэд шүүх, хуулийн байгууллагад итгэл алдарч, тэд шударга ёсыг тогтооно гэдэгт итгэхээ больж эхэлсэн нь түгшүүрийн харанга дэлдсэн үйл явдал мөн.
Шинэтгэл гэдэгт байгаагаа өөрчлөхөөс гадна байхгүйг нь бий болгох явдал мөн хамаарна. Манайд маш олон төрлийн хууль тогтоомж хэрэгтэй байна, гэхдээ нийгмийн амьдралд бүхэлд нь нөлөөлөхөөр, иргэн хүн хэвийн амьдрахад шаардлагатай орчин нөхцлийг бүрдүүлэх болон эдийн засгийн хувьд улс орноороо урагшилж дэвшихэд шаардлагатай амин чухал хуулиуд шүү. Эрүүгийн хууль тогтоомжын шинэтгэл, моргэйжийн зах зээл болон даатгалын системийн иж бүрэн зохицуулалт, байгаль орчин хамгааллын үр нөлөө, системтэй хууль гээд л тоочоод байвал мөн ч урт хөвөрнө дөө. Одоогийнхоороо байвал болох уу гэвэл болох л байх. Гэхдээ авилга улам гаарч, баялаг хэдхэн хүний гарт төвлөрөн, эрх баригчид өөрт нь таалагдаагүй нэгнийг ямар ч аргаар хамаагүй шорон гянданруу илгээж, эргэлзээтэй ойлгомжгүй хөрөнгө оруулалтын орчинд нь цөөн хэдэн орны, бохир мөнгө эргэлдсэн, үндсэн хуулиндаа ардчилал гэсэн тунхагтай, үнэндээ бол улс төрөөс бүх зүйл нь хамаарсан тааруухан л газар болно доо, манай эх орон.
Батлан мөрдүүлэх шаардлагатай олон чухал хууль байхад тэдгээр нь улс орны хувьд үлэмж ач холбогдолтой байхад бөхийн цол олгох уу, олгохгүй юу гэдэг дээр хэрүүл хийгээд сууж байгаа манай парламент дэндүү ичгэвтэр харагдаж байна. Анхнаас нь хууль гаргах шаардлагагүй, дүрмээр зохицуулаад болох байсан зүйлийг хэдэн жилийн өмнө нэг нь санаачилсан болж, нөгөө нь баталсан болж хий сүржигнэсний гай өнөөдөр ч үргэлжилсээр байгаагийн тод жишээ. Гэтэл УИХ-ын гишүүнээр ажиллах дөрвөн жилийн хугацаа бол ард түмнийхээ төлөө хууль боловсруулж, санаачилж, баталж байх ёстой үнэт цаг хугацаа шүү дээ. Өөрсдөө чадахгүй бол ядаж бусдад боломж олгодог байх ёстой. Хууль зүйн үндэсний хүрээлэн олон жилийн турш судалгаа хийж, санал боловсрууллаа. Үүнээс хэд нь хууль болж, хэд нь хууль тогтоомжид тусгалаа олов, хэн тэднийг сонсож байна гэвэл тун бага тоо гарна. Гэтэл тэнд чинь хуулийн ТМС гэж хэлүүлтлээ чанар нь унасан оройн ангийг төгссөн их мэдэгчид биш, эрх зүйн шинжлэх ухааны зэрэг дэстэй судлаачид ажиллаж байгаа юм. Энэ цаг үе манай улсын хувьд үндэсний эрх зүйгээ төлөвшүүлэх, өөрсдийн онцлогт тохирсон системтэй болох тун чухал цаг үе. Хууль нь батлагдсан л бол мөрдөгддөг, шүүх нь аливаа хэрэг маргааныг зөвхөн хуульд нийцүүлэн шийдвэрлэж, төрийн байгууллага албан тушаалтны үйлдэл, эс үйлдэл нь гагцхүү хуульд нийцдэг байхад системийг хэрхэн цогцлоох, үндэстнийхээ онцлогийг хэрхэн тусгах вэ гэдэг нь голлох үүрэгтэй. Зарим хуулиудыг гаднаас шууд орчуулаад хэрэглэхэд болж байхад зарим нэгнийг нь өөрсөддөө тохируулахгүйгээр, нийгмийн байдал, цаг үеийнхээ онцлогийг харгалзахгүйгээр шууд авч хэрэглэвэл ямар сөрөг үр дагавар дагуулдгийн томоохон жишээ болдог. Үүний тод жишээ нь “Төсвийн байгууллагын удирдлага санхүүжилтийн тухай хууль” байна.
Парламентийн үүрэг юу вэ гэдгийг бид нэг л мартаад байх шиг. Тэд хууль тогтоох үүрэгтэй. Гэхдээ энэ нь юуг ч хамаагүй батлаад, санаачлаад түүнийгээ тойроод хэрэлдэж маргалдаад, жүжиг тавиад сууна гэсэн үг биш. Сонгуулийн хууль, төсвийн хууль хэлэлцэхээрээ танхимдаа багтаж ядан оволзчихоод шүүхийн шинэтгэлийн тухай болохоор хөдөлж ядаад байгааг нь харахаар, ухаж гаргаагүй баялаг хуваарилж, бөхийн цол ярихыг нь сонсохоор “энэ хэд маань анх сонгогдох үедээ хийх ажлаа, үүрэг хариуцлагаа бүрэн ойлгосон л байдаг байгаадаа” гэж өөрийн эрхгүй бодогдох юм. Байдал энэ чигээрээ удаан үргэлжилбэл, зөвхөн УИХ төдийгүй хуулийн хэрэгжилтийг хангах үүрэгтэй Засгийн газар энэ маягаараа ажилласан хэвээр байвал тун удахгүй “Монголын хууль нэг хоног” гэж ярих байх. Гэтэл хэдэн арван жил тогтвортой мөрдөгдөж байгаа хуулиудтай, түүндээ тулгуурлаад хөгжчихсөн улс орнууд зөндөө байна, цаана чинь.