Үндэсний эрх чөлөөний хувьсгалын 100 жилийн ой 2011 онд тохиож байгаатай холбогдуулан энэ сарын 29-нийг бүх нийтээр амрах баярын өдөр болгохыг Засгийн газрын хуралдаанаар дэмжиж, энэ өдрийг бүх нийтийн амралтын өдөр болгох   шийдвэр гарсан.  Бүх нийтийн амралтаар аж ахуй, нэгж байгууллага нийтээр амардаг бол энэ өдөр амардаггүй хэд хэдэн газар байдаг. Тэр нь томоохон худалдааны төвүүд юм. Энэ талаар нийслэлийн Засаг даргын тамгын газрын Үйлдвэр үйлчилгээний хэлтсийн мэргэжилтэн н.Сэргэлэнгээс  тодруу­лахад “Бүх нийтийн амралтын өдөр болгосон ч ихэнхдээ баяр ёслолоор томоохон худалдааны төвүүд ачаалал ихтэй ажилладаг. Арванхоёрдугаар са­рын 29-нийг энэ жилээс бүх ний­тийн амралтын өдөр болгож бай­гаа учраас одоогоор худалдааны төвүүд бидэнд мэдээлэл өгөөгүй байна. Шинэ жилийн баяр болж байгаа учраас дэлгүүр, худалдааны төвүүд ажиллахгүй бол болохгүй байх. Гэхдээ эцсийн шийдвэрээр ажиллахгүй, ажиллана гэсэн мэдээлэл өгөөгүй байна” гэлээ.

Энэ сарын 29-нд буюу бүх нийтийн амралтын өдөр “Нарантуул” олон улсын худалдааны төв ажиллах эсэх талаар “Нарантуул” олон улсын худалдааны төвийн менежер Н.Эрхэмбатаас тодруулахад “Бүх нийтийн амралтын өдөр ч гэсэн бид иргэддээ үйлчлэх зорилгоор энэ жил ажиллана. Дээрээс нь шинэ жилийн баяр болж байгаа учир ажиллах шаардлага худалдаадчдад маань байгаа” гэлээ. Түүнчлэн  Улсын их дэлгүүр, “Бөмбөгөр” болон бусад томоохон худалдааны төвүүд ч бас ажиллах юм байна.

Цагаан сар, Улсын баяр наадам гэсэн үндэсний баяруудаас илүү бид хамгийн өргөн тэмдэглэдэг баяруудын нэг нь яах аргагүй Шинэ жилийн баяр. Хоёр он солигдох мөчийг гэр бүл, найз нөхдийн хүрээнд тэмдэглэн бие биедээ бэлэг барьдаг болсоор удаж буй бидний хувьд шинэ жилийн баяраар худалдааны төвүүд ажиллахгүй байна гэдэг хүндхэн асуудал болох биз. Шинэ жилийн баяр хаяанд ирсэн энэ цаг мөчид бүх нийтийн амралтын өдрүүдэд хамгийн их ачаалал ихтэй газрууд томоохон худалдааны төвүүд. Хэдийгээр бүх нийтийн амралт болсон ч гэсэн орлогын хамгийн ашигтай үе байх тул худалдааны төвүүд өөрсдийн ашгаа бодсон ч гэсэн зайлшгүй ажиллах шаардлага бий болдог. Иргэдэд ч гэсэн амарч байгаа өдрөө дэлгүүр, худалдаа, наймаа хийх нь хамгийн ашигтай цаг үе.

Монгол Улсын хувьд Хөдөл­мөрийн тухай хуульд бүх нийтийн ам­ралтын найман өдөр байдаг юм байна. Ямартай ч  албан ёсны бүх нийтийн амралтын өдрүүдэд томоо­хон худалдааны төвүүд  мөн амардаг ч энэ жилийн хувьд шинэ жилийн баяр болоход хоёр хоног үлдсэн байгаа учраас амрахгүй юм байна.