Ашигт малтмалын газраас гаргасан судалгаагаар Монгол Улсын нүүрсний 15 сав газар,  гурван талбайд хамаараг­дах нийт 300 гаруй орд, илрэ­лийн геологийн таамаг нөөц 162.3 тэрбум тонн. Цаашдаа  уг нөөцийг геологичид өсгөх магадлалтай гэж тогтоо­сон байна. Манай орон нүүрс­ний нөөцөөрөө дэлхийн эхний 10 орны тоонд багтдаг. Ихэнх аймаг, бүсийн түлш эрчим хүчний найдвартай гэж үүсвэр нь өнөөдрийн байдлаар нүүрс хэвээр байгаа агаад цаашид ч тийм байх ажээ. Өргөн уудам нутагт сийрэг байрших хэрэг­лэгч­дийг түлшээр хангах асуудлыг бүсчилсэн хөгжлийн хөтөлбөрт төв, хангай, баруун, зүүн, говийн гэсэн таван бүс нутагт хуваадаг билээ. Нүүрс бол Монгол орны нутаг дэвсгэрт харьцангуй жигд тархмал байдаг. Нутгийн зүүн, төв бүсүүдэд хүрэн нүүрс, говийн болон баруун бүсүүдэд коксжих болон чулуун нүүрс зонхилж тархсан. Өнөөдрийн байдлаар Монгол орны хэмжээнд нийт 123 аж ахуйн нэгж 172 ашиг­лалтын тусгай зөвшөөрөл эзэмшиж байгаагаас 105 ашиг­лалтын тусгай зөвшөө­рөл­тэй талбайд 50 гаруй аж ахуйн нэгж идэвхтэй үйл ажиллагаа явуулж байгаа аж. Нүүрсний нийт олгогдсон 172 тусгай зөвшөөрлөөс 39 нь Налайх дүүрэгт, энэ нь олборлолт хийж буй уурхай­нуудын 37 хувийг, улсын төс­вийн хөрөнгөөр хийж байгаа хайгуулын талбайн 56.4 ху­вийг, хувийн хөрөнгөөр хай­гуул хийж байгаа талбайн 7.6 хувийг эзэлж байна. Нүүрсний хэрэглээнд 2005 оныг хүртэл дулааны цахил­гаан станциудын буюу эрчим хүчний хэрэглээ зонхилж байжээ. Тэгвэл сүүлийн жилүү­дэд нүүрсний олборлолтын хэмжээ эрчимтэй нэмэгдэж сүүлийн хоёр гурван жилд экспортын хэмжээ нүүрсний үйлдвэрлэлд зонхилох хувийг эзлэх болсон байна.