Лондонгийн олимп хором хормоор наашилсаар. Монголын шигшээ багийнхан энэ үед олимпийн бэлтгэлжилтийн талаар тал бүрээс нь хэлэлцэж байна. Үүний нэг жишээ нь спорт элэгтэй хүмүүсийн гурван талт уулзалт хэлэлцүүлэг байлаа. “Чингис”-т болсон уг нээлттэй хэлэлцүүлэгт шигшээ багийн дасгалжуулагч нар, мөн эрдэмтэн судлаачид, БТСГ болон олимпийн хорооны тэргүүнүүд оролцсон юм. Мөн Лондонгийн олимпод оролцох Монголын багийн ахлагч, Монгол Улсын шадар сайд М.Энхболд хүрэлцэн ирэв. Шигшээ багийнхны илтгэл дээр үндэслэн шинжлэх ухаан талаас нь нэлээд нухацтай хэлэлцсэн уг хурлын талаар оролцогчдын байр суурийг сонслоо.

-Манай жүдочид одоогоор олимпийн оноо олгох цуврал тэмцээнүүдэд оролцож байна. Боломжийн хэмжээнд амжилт үзүүлж байгаа. Нэлээд хэдэн тамирчин шилдэг 16-д бичигдэж байгаа учраас энэ эрчээрээ явбал 10-аас илүү тамирчин эрх авах бололцоотой. Х.Цагаанбаатарын бэртэл, гэмтэл гайгүй болсон. Одоогоор манай жүдочдоос бэртэлтэй тамирчин алга байна.

-Бидний хувьд олимпийн нэг эрхтэй байгааг хүн бүр мэдэх биз. Одоо ирэх оны нэгдүгээр сарын Катарын Дохад олимпийн эрх олгох ганц тэмцээн бий. Энэ тэмцээнд манайхан есөн төрлөөр оролцохоор бэлтгэлээ базааж байна. Төрөл тус бүрт эхний хоёр байрт шалгарсан тамирчинд олимпийн эрх олгох юм. Бэлтгэл сургуулилт хэвийн хэмжээнд үргэлжилж байгаа.