Киотогийн протоколд нэгдэхээс татгалзаж байсан АНУ-ын хандлага одоо ч хэвээр байна. Харин Хятадын төлөөлөгчид “АНУ хөдлөхгүй бол бид ч бас хөдлөхгүй” хэмээн мэдэгдэж байв. АНУ-ыг дагаад ОХУ, Япон, Канад улс Киотогийн протоколын шинэ хувилбарыг дэвшүүлж, түүнд нэгдэхээс татгалзах болж. Хамгийн том бэрхшээл нь энэ юм. Гэхдээ агаарын бохирдлыг бууруулахын тулд Хятадын зүгээс тодорхой алхам хийхэд бэлэн байгаагаа саяхнаас мэдэгдсэн. Сүүлийн жилүүдэд Хятадын өмнөд нутагт цас, борооны мөстлөг ойр, ойрхон болжээ. Уг нь энэ бол тун ховор тохиолддог үзэгдэл. Гэтэл давтамж нь нэмэгджээ. Түүнчлэн Хятадын баруун, өмнөд нутгаар ган гачиг их болсон. Үүнээс болж ургац алдсан нь тус улсад хүнсний бараа, бүтээгдэхүүний үнэ өсөхөд хамгийн их нөлөөлжээ. Тиймээс хямд ажиллах хүчээр дамжуулж үйлдвэржилтээ өргөжүүлэн эдийн засгаа хөгжүүлж, үүнээс болж хүлэмжийн хий их хэмжээгээр “үйлдвэрлэх” болсон ч Хятад улс уур амьсгалын өөрчлөлтийг багасгахын тулд хөдлөх цаг нэгэнт болсныг НҮБ-ын бага хуралд оролцохоор ирсэн Хятадын эрдэмтэн Шюй Иньлүн онцолсон юм. Үүнтэй холбоотойгоор НҮБ-ын “Ногоон уур амьсгал” сангийн хөрөнгийг 2020 он гэхэд 100 тэрбум ам.долларт хүргэх санал ч тавьжээ. Дэлхийн дулаарлын эсрэг хамгийн идэвхтэй тэмцдэг Европын холбооны төлөөлөгчид “Хэрэв Хятадын тал дорвитой санаачилга гаргавал Киотогийн протоколын шинэчилсэн хувилбар батлагдаж, түүнд олон орон нэгдэх боломжтой болно” хэмээн онцолж байна. Дэлхий дээрх хүлэмжийн хийн 40 гаруй хувийг зөвхөн АНУ, Хятад улс үйлдвэрлэдэг. Тиймээс эдгээр орны оролцоо хамгийн их хэрэгтэй байгаа юм.
НҮБ дэлхийн цаг уурын өөрчлөлтийн тухай конвенцыг 1992 онд баталснаас хойш таван жилийн дараа Киотогийн протоколыг баталж байв. Тухайн үед 159 орон Киотогийн протоколд нэгдсэн юм. Тэд хүнд үйлдвэрүүдийнхээ тоог цөөлж байгаад ч хамаагүй хүлэмжийн хийг бууруулж, 2008-2012 он гэхэд хорт хийн хэмжээ 1990 оноос 5.2 хувиар багасгахаар тооцсон. ОХУ 1999 онд энэ гэрээнд нэгдэж, 2005 оноос тус улсын нутаг дэвсгэр дээр протоколын заалтууд хэрэгжиж эхэлжээ. Киотогийн протоколын дагуу дэлхийн агаарын дулааныг хоёр хэмээс илүү нэмэхгүй байх шаардлага тавьсан. Гэтэл үйлдвэржсэн орнууд хүлэмжийн хийг бууруулах талаар тодорхой алхам хийхгүй бол ердөө 20 орчим жилийн дараа агаарын дулаан зургаан хэмээр нэмэгдэх тооцоо бий. Уур амьсгалын өөрчлөлттэй холбоотой НҮБ-ын бага хурлыг анхандаа олон улсад төдийлөн ойшоодоггүй байжээ. Хэдхэн улс хуралдаж “Цаг агаар өөрчлөгдөх нь үү”, “Дулаахан болох нь уу” гэх мэтээр ярилцах төдий өнгөрч байна” хэмээн ойлгодог байсан боловч энэ нь яваандаа глобаль шинжтэй асуудал болж хувирсан юм. Дэлхийн цаг агаар дулаарч байгаагаас болж байгалийн гамшиг их болсон. Судлаачид сүүлийн жилүүдэд улс орнуудад дараалан болж байгаа үер, усны гамшиг, газар хөдлөлт зэргийг уур амьсгалын өөрчлөлттэй холбон тайлбарлаж байна. Хэт халуун болсны уршгаар хүнсний ихэнх ургамал ургах нөхцөл үгүй болсон. Үүнд хамгийн түрүүнд улаанбуудайн ургац буурч байгааг жишээ татаж болно. Мексикийн зарим бүс нутагт хэт халалтаас болж нэг га газраас хурааж авдаг улаанбуудайн хэмжээ гурав дахин багасчээ.
АНУ Киотогийн протоколд нэгдэхээс анхнаасаа татгалзсан. Билл Клинтон, Жорж Буш хэн, хэн нь үүнд тийм ч их ач холбогдол өгөхгүй байсаар өдийг хүрсэн. Улстөрчид нь ч бас цаг уурын өөрчлөлттэй холбоотой асуудлыг хэзээнээсээ үл тоомсорлосоор иржээ. Сонгуулийн үед Бүгд найрамдах, Ардчилсан намаас нэр дэвшигчид “Дэлхийн дулаарал санаа зовохуйц хэмжээнд хүрээгүй” хэмээн мэдэгдэж байв. Гэтэл “Bloomberg”-ээс гаргасан мэдээлэлд зөвхөн Ж.Буш Ерөнхийлөгч байх хугацаанд л гэхэд АНУ-д хүлэмжийн хийy ялгаруулалт нь 45 хувиар нэмэгджээ. “Үүнийг сүйрэл гэхгүй юм бол өөр юуг ингэж нэрлэх вэ” хэмээн “Тайм” сэтгүүл онцолсон юм. Харин Киотогийн протокол төдийгүй удахгүй батлагдах шинэ гэрээн дэх АНУ-ын оролцоо Хятадаас дутахгүй их байхыг шаардаж байна.
Сүүлийн үед Хятад улс сэргээгдэх эрчим хүчний салбар дахь хөрөнгө оруулалтаа нэмэгдүүлсэн. Австралийн Засгийн газар нүүрс хүчлийн хий ялгаруулж байгаа үйлдвэр, техникт өндөр татвар ноогдуулсан. Евро оршин тогтнох эсэхийг шийдэх санхүүгийн хямралтай нүүр тулчихаад байгаа боловч Германы эрх баригчид энэ салбарт хөрөнгө хаясаар байна. Өнгөрсөн онд сэргээгдэх эрчим хүчний хэрэглээг нэмэгдүүлэхийн тулд дэлхийн улс орнууд нийт 187 тэрбум ам.долларын хөрөнгө оруулалт хийжээ. Энэ нь шатахуун, түлшний салбар дахь 157 тэрбум ам.долларын хөрөнгө оруулалтаас давсан мөнгөн дүн юм. Энэ бол анхны тохиолдол. Хэдийгээр НҮБ-ын түвшинд улс орнууд нэгдэж чадахгүй байгаа боловч хүлэмжийн хийг бууруулахын тулд тус бүртээ тодорхой алхам хийсээр байна.
"Улс төрийн тойм" сонин