Сүхбаатарын талбай дээр өлсгөлөн зарлаад буй Амлалт нэхэх ард түмний хөдөлгөөнийхнийг дэмжихээр ирсэн оюутнуудаас баривчилсан гэх мэдээллийг тодруулахаар Тусгаар тогтнол эвслийн зохицуулагч Л.Цогтой холбоо барилаа.

-Талбай дээр та нарыг дэмжихээр ирсэн оюутнуудыг баривчилсан юм уу?

-Тийм байна. Би одоо талбай дээр очихоор яарч явна. Манайхныг дэмжихээр очсон оюутнуудаас Сүхбаатар дүүргийн цагдаагийн ажилтнууд гурван оюутныг барьж, урьд шөнө хорьсон байна.

-Ямар үндэслэлээр тэр вэ?

-Одоогоор сайн мэдээгүй байна. Бас тэднийг өмгөөлөхөөр очсон Эрс шинэчлэл хөдөлгөөний нэг хүнийг цагдаа зодсон гэсэн мэдээлэл авлаа.

-Хэн гэдэг хүн юм?

-Тэр хүний нэрийг мэдээгүй байна. Бас өмгөөлөгч Ц.Монгол оюутнуудыг өмгөөлнө гэж очсон байна.

-Өлсгөлөн зарлагчдын байдал ямар байна?

-Одоохондоо гайгүй, гэхдээ нэмж 50 гаруй хүн өлсгөлөн зарлана гээд биднийг сандаргаж байна. Хот, хөдөөд суулт тэмцэл үргэлжилж байна.

Д.ОЮУН