-Манай улсын хоёр оюутныг хар тамхи зөөсөн гэх үндэслэлээр урд хөршид саатуулсан гэсэн мэдээлэл гарсан. Энэ талаар мэдээлэл өгнө үү?
-Манай яаманд хоёр монгол оюутныг саатуулсан тухай албан бичиг ирүүлсэн ч тодорхой мэдээлэл өгөх боломжгүй байна. Маргааш /өнөөдөр/ болох шуурхай хуралдааны үеэр энэ талаар дэлгэрэнгүй мэдээлэл өгнө. Тиймээс хуралдааны дараа сэтгүүлчдэд илүү дэлгэрэнгүй мэдээлнэ.
Гадаад харилцааны дэд сайд дээрх хариултыг өгсөн юм. Ямартай ч өнөөдөр тэдгээр оюутны талаарх дэлгэрэнгүй мэдээллийг Гадаад харилцааны яамнаас өгөх боломжтой болох юм байна. Харин эх сурвалжийн мэдээлснээр Хятадын тал энэ талаарх мэдээллийг хэвлэл мэдээллийн хэрэгслээр гаргахгүй байх хүсэлтийг Гадаад харилцааны яаманд тавьсан аж.
Одоогийн байдлаар БНХАУ-д хар тамхи, мансууруулах төрлийн бодис тээвэрлэж, худалдаалсан гэх хэргээр Монголын арав гаруй иргэн хоригдсон аж. Харин энэ тоог нэмсэн хоёр оюутан нь тус улсад суралцдаг байсан бөгөөд 500 граммаас дээш хэмжээний мансууруулах төрлийн бодис зөөвөрлөж явсан гэх мэдээлэл байна. БНХАУ-ын хуулиар 50 граммаас дээш хэмжээтэй мансууруулах төрлийн бодис зөөвөрлөх, худалдахыг завдсан тохиолдолд цаазаар авах ял оноодог байна.
"Улс төрийн тойм" сонин