Ливийн хурандаа Муаммар Каддафийн дэглэмийн үед тагнуулын газрын дарга байсан Абдулла аль-Сануссиг баривчилсан талаар тус улсын түр засгийн газар мэдээлжээ.Каддафийн хүргэн байсан тэрбээр Ливийн өмнөд хэсгийн Сабха хотод бүгэж байсан гэнэ. Абдулла аль-Санусси Олон улсын шүүх болон Ливийн түр Засгийн газрын эрэн сурвалжилж байсан Каддафийн сүүлчийн өндөр албан тушаалтан билээ.

Муаммар Каддафийн залгамжлагч гэгдэж байсан түүний хүү Сэиф Аль-Исламыг өнгөрсөн бямба гаригт баривчилсан юм. Сэиф аль-Ислам, Санусси нарыг Олон улсын шүүх эрэн сурвалжилж байсан билээ. Ливийн удирдагч асан Муаммар Каддафийн баруун гар байсан  62 настай Абдулла аль-Сануссиг босогчдын эсрэг цуст үйл ажиллагаа зохион байгуулсан хэрэгт буруутган Олон улсын шүүхэд дуудсан. Түүнийг 1996 онд Триполи хотын Абу Салим шоронд 1000 гаруй хоригдлыг зэрлэгээр хөнөөсөн хэрэгт мөн буруутгаж байгаа ажээ.