Өнгө өнгийн гэрлэн чимэглэлтэй гацуураа нүд гялбам чамин, хөөрхөн тоглоомуудаар чимэглэж, сэтгэлдээ аз жаргал, догдлол тээн угтдаг шинэ жилээ бид хоног тоолон хүлээж эхэллээ. Харин та 2012 оны гацуураа ямар тоглоомоор чимэглэх гэж байна вэ? Жилийн жилд гадны чанартай, чанаргүй чимэглэлийг худалдан авдаг заншлаа энэ жилдээ орхивол ямар вэ. Түүнийхээ оронд шинэхэн загвартай, өнгө үзэмжтэй, бас өөртөө төдийгүй бусдад аз жаргал, урам зориг бэлэглэх тийм ид шидтэй тоглоомтой болохыг хүсч байна уу? Шинэ жилийн сүрлэг гацуур модны энэ жилийн чимэгийг Хөгжлийн бэрхшээлтэй иргэд сэтгэлийн гүнээс баяр баясал дүүрэн урлаж бидний баяр дээр баяр нэмэх гэж байна. Бид энэхүү тоглоомуудаар сүлд моддоо чимэглэснээр өөртөө бусдад аз жаргал, сэтгэлийн халуун дулаан илч бэлэглэхийн дээр нийгэмд маш том хөрөнгө оруулалт хийх болно.

“Uptown” сэтгүүлээс санаачлан өрнүүлж буй энэхүү бэлгийн аян захиалгаа авч эхэллээ.  Аз жаргал гэдэг өчүүхэн жижиг инээмсэглэлээс эхэлдэг. Та бидний дэмжин оролцох энэ үйлээс олон хүний сэтгэлд баяр баясал гийж, нэгэн шинэ оныг хамтдаа баяр хөөр, аз жаргалаар дүүрэн угтана гэдэгт итгэлтэй байна. Амьддаа бие биенээ хайрлахын учир энэхүү баярын бэлэг, чин сэтгэлийн илгээлтийг хамтдаа эхлүүлцгээе.