Хүчингийн хэрэгт буруутгагдаж буй Жулиан Ассанжийн шүүх хурлаар түүний хэргийг Шведийн шүүхэд шилжүүлэх шийдвэрийг өчигдөр гаргажээ. Их Британийн давж заалдах шатны шүүхийн шүүгч Лорд Жонн Томас, Данкан Осли нар Ассанжийг  Лондонд үлдээх хүсэлтийг хэрэгссэнгүй. Жулиан Ассанжийг давж заалдах эсэхийг тогтоох шүүх хурал энэ сарын эцсээр болох юм байна.  “Wikileaks”-ийг үндэслэгч Жулиан Ассанжи нэг жилийн өмнөөс Лондонд гэрийн хорионд байгаа юм. Тэрбээр өчигдөр Лондонгийн дээд шүүхэд “Би ямар ч улсын хуулийг зөрчөөгүй” хэмээн мэдүүлжээ.

Жулиан Ассанжиг 2010 оны наймдугаар сард хоёр Швед бүсгүйг хүчирхийлсэн хэрэгт сэжиглэн баривчилсан юм. Энэ хэрэг АНУ-ын элчин сайдын яамны нууц баримт, мэдээллийг илчилсэн “Wikileaks”-ийн үйл ажиллагаатай огт холбоогүй боловч хэрэв түүний хэрэг Шведийн шүүхэд шилжвэл тэд түүнийг АНУ-д хүлээлгэн өгнө гэж өмгөөлөгч нар нь үзэж байгаа юм. “Wikileaks” өнгөрсөн жил АНУ-ын дипломат харилцааны маш нууцын зэрэглэлд багтах, ноцтой 250 мянга гаруй мэдээ, баримт сэлтийг нийтэд дэлгэсэн юм. Харин үүний хариуд АНУ “Wikileaks” сайтын санхүүгийн эх үүсвэрийг  боомилж эхэлсэн билээ.