Сонгууль дөхлөө. УИХ, орон нутгийн сонгуульд нэр дэвших хүмүүсийн нэрс ч эхнээсээ тодорч байх шиг. Тэд юу хийж олонд танигдаж, таалагдахаа мэдэхгүй асуудал болгон руу үсчиж байна. Хэсэг залуус фэйсбүүк, твиттерийг эзлээд, олон танилтай болчихвол ирэх сонгуулиар сонгогдох магадлалтай гэж бодсон уу байж байгаад л танил болох урилга орж ирэх маягтай. Сангийн дэд сайд л гэхэд улаан фэйсбүүкчин бөгөөд, гадаад хэлтэй гэдгээ хүмүүст хүргэхийн тулд дандаа англиар бичнэ. Даанч манай монголын фэйсбүүкчдэд энэ чадвар нь нэг их сонин содон зүйл биш л дээ. Ингэхэд ирэх сонгуулиар УИХ-д өрсөлдөхөөр зорьж байгаа хүмүүст хандаад хэдэн санааг дамжуулж орхиё. Эхлээд нэр дэвших эсэх асуудлаа баталгаатай болгох хэрэгтэй. Энэ ажилтайгаа хамтатгаад телевизийн нэвтрүүлэг, сонины орон зайд ярилцлага өгч байхад гэмгүй. Нэр дэвших нь тодорхой болбол үргэлжлүүлээд явчихна, бүтэлгүйтвэл нийгмийн нэг хэсэг ч гэсэн таныг мэдээд үлдэг л дээ. За ингээд нэр дэвших эрхээ олж авсан даруйдаа тойргоороо явж ажиллах хэрэгтэй. Энгийн хувцас өмсөөд ард иргэдтэй уулзаж “худлаа” инээгээд л. “Асуудал байвал шийднэ” энэ тэр гэж бөөн сүр, сүр үг хэлэхээ бас мартаж болохгүй. Энэ үгээ ч батлаж зарим нэг эмээ, өвөө нарт түлээ нүүрс бэлэглэж болно. Мөн өрх толгойлсон, олон хүүхэдтэй эх хүнд тусламжийн гараа сунгаж нэг хүүхдийнх нь сургалтын төлбөрийг өгч буян болох хэрэгтэй. Ингээд өөрийгөө таниулсаныхаа дараа судалгаа хийх шаардлагатай. Учир нь судалгаагүй харанхуй ажиллаж болохгүй шүү дээ. Таныг нийгмийн яг ямар хэсэг нь илүү их мэддэг болохыг судлаж аваад дараагийнхаа ажилд орно доо. Мэддэг хэсэг бүлэгтээ нэг их анхаарч биечлэн ажиллаад хэрэггүй. Харин таныг огтоосоо мэддэггүй тэр бүлэгт харин их наалдаж ажиллах хэрэгтэй дээ. Гудамжаар алхаж, хүмүүсийн хойноос “Би УИХ-ын сонгуульд танай тойрогт өрсөлдөж байгаа…. байна аа. Намайг дэмжээрэй” гэж хэлээд дагах ч юм уу, аль болох л олон хүнд өөрийгөө таалагдуулах хэрэгтэй. Зарим айлын түлээ нүүрсийг гэрт нь дөхүүлж өгөх, усыг нь зөөж өгөх гээд нийгэмд тустай, гэр бүлд ашигтай хөдөлмөр эрхэлж хүмүүст таалагдвал илүү догь шүү дээ. Нэгэнт ингэж ажилласан байхад сонгогдохгүй болов уу гэж айх ямар ч хэрэггүй. Эрхэм нэр дэвшигч танд амжилт хүсье.
Б.Энхмөнх
"Улс төрийн тойм" сонин