Карл Орфийн “Кармина бурана”, Р.Шедрин “Кармен Сюита” Монголын тайзнаа эгшиглэх гэж байна. Энэ сарын 5-нд буюу ирэх бямба гаригт Улсын дуурь бүжгийн эрдмийн театрын тайзнаа энэ хоёр гайхалтай бүтээл эгшиглэх юм. “Кармина Бурана” нь XIII зуны үеийн уран зохиолын дурсгалт бичгийн хэсгээс сэдэвлэсэн гоцлол дуучид, найрал дуу, найрал хөгжимд зориулсан тайзны кантат юм. “Кармина бурана” нь оршил, төгсгөл, занги 25 хэсгээс бүрдэнэ. “Кармина Бурана” тайзны кантатыг Урлагийн гавьяат зүтгэлтэн, удирдаач Ж.Бүрэнбэх симфони найрал хөгжмийн удирдан, УДБЭТ-ын гоцлол дуучин, Гавьяат жүжигчин С.Мөнгөнцэцэг, дуучин Б.Эрдэнэтуяа, Ч.Түмэндэмбэрэл, А.Сайнбаяр, Ч.Энхтайван нар гоцлон УДБЭТ, ЦДБЭЧ, ХБК-ийн найрал дуучид Монголын тайзнаа амилуулах юм. 1937 онд бичигдсэн энэ бүтээл хөг, аялгуу, зохиомжийн хувьд эртний Миф, Бавар үндэстний онцгой аялга, хэм хэмнэл дээр үндэслэн тухайн үеийн баруун европийн хөгжмийн театрын шинэчлэлд тодорхой шийдвэрлэх нөлөөг үзүүлж чадсан нь өнөөг хүртэл дэлхийн тайзнаа тоглогдсоор байгаа юм.

Тоглолтын хоёрдугаар хэсэгт Ж.Бизегийн алдарт “Кармен” дуурийн хөгжмийг Родион Шедрин дан утсан хөгжим болон цохивор хөгжмийн хамтлагт хөрвүүлэн найруулсан “Кармен Сюита”-г анх удаа эгшиглүүлэх аж. Москвагийн их театрын тайзнаа 1967 онд нэгэн том үйл явдал болсон нь нэг үзэгдэлт “Кармен” балет байв. Гол дүрд нь дэлхийн алдарт бүжигчин Майя Плисецкая бүжиглэж, Кубын алдартай бүжиг дэглээч Альберто Алонсо энэ балетыг дэглэсэн юм. Энэхүү бүтээл нь сэтгэлийн хөдөлгөөний эрс тэрс өөрчлөлтийг маш нарийн хөгжмийн хэллэгээр гаргаж чадсан агуу бүтээл болсон ба хөгжмийн болоод балетын түүхэнд нэгэн гоц шигтгээ бүтээл болж чаджээ. Энэхүү гайхалтай бүтээлийг зууны манлай удирдаач Ж.Чулуун агсны хүү Урлагийн гавьяат зүтгэлтэн, дэд профессор Ч.Чинбат Р.Шедрины “Кармен Сюита”-г Родион Шедрины партитурт заагдсан хөгжимчдийн тоог бүрэн бүрэлдэхүүнээр нь тоглох гэнэ. Тоглолтод Улсын дуурь бүжгийн эрдмийн театрын утсан хөгжимчид бүрэн бүрэлдэхүүнээрээ, мөн ХБК-ийн симфони найрал хөгжим, Монголын нэрт хөгжимчин, сурган хүмүүжүүлэгч багш, Соёлын тэргүүний ажилтан Б.Зоригтын цохивор хөгжмийн хамтлаг оролцох нь ээ.