Булган аймгийн Булган сумын Засаг даргын тамгын газраас аймгийн төв буюу сумынхаа малчдын зөвлөгөөнийг анх удаа зохион байгууллаа. Байгуулагдаад 80 жилийн түүхэн замнал туулсан тус сум энэ ажлыг анх удаа зохион байгуулж байгаагийн учир мал нэгдлийн өмч байсан он жилүүдэд аймгийн төвийн цөөн тооны айл өрх хувийн цайны сүүний үнээ, шөлний ганц нэг хонь, ямаатай байсан бол өөрчлөлт шинэчлэлийн үеэс л “малжиж” эхэлсэн байна. Ингээд хориод жил өнгөрч, нэлээд айл өрх мал маллаж, сум, багийн удирдлагаас амьжиргааны дэмжлэг “нэхэж” хэл ам гаргалгүй гэр бүлийн амьжиргаагаа авч явна. Харин ч баяр наадам, тэмдэглэлт ой, чухал үйл явдлын үеэр баг сумын удирдлагадаа цагаан идээ, айраг сүүний дэмжлэг үзүүлдэг болжээ.

Зөвлөгөөнд оролцогчдыг төлөөлж 10 гаруй малчин үгээ хэлэв. Нутгийнхандаа “цаг уурын” хэмээн нэрлэгддэг Ж.Чулуун малчин болоод 15 жилийг үджээ. Тэрбээр аж амьдралын минь эх үүсвэр болж, өрх гэр үр хүүхдүүд бидэнд үр шимээ хүртээж байна хэмээн мал сүргээрээ бахархав. Малын хөлийн татвар авахгүй болсон нь буруу. Үүнийг сэргээе. Бид өгье. Тэрхүү хуримталсан татварын мөнгийг мал эмнэлгийн үйлчилгээг өргөтгөх болон бусад арга хэмжээнд зарцуулмаар байна. Нутаг бэлчээрийг малчдад эзэмшүүлж гэрчилгээ олгох хэрэгтэй гэхчлэн хэд хэдэн чухал санааг сумынхаа удирдлагуудад дуулгав. Хорин жил мал малласан ч багш хэмээн дуудуулсаар яваа Ш.Дашбалжир малын хулгай их байдгийг баримтаар яриад хэлтэс цагдаагийнхан илрүүлэлгүй орхидог, одоо бүр сум дамжин гардаг боллоо. Бидний малыг ченжээр биш багийн Засаг дарга нараар дамжуулан борлуулдаг болмоор байна гэсэн бол мөн багш Б.Дэмбэрэлдорж худаг ус, бэлчээр нутгийн маргааныг малчид өөрсдөө зохицдог уламжлалт аргаар шийдвэрлэх нь зүйтэй гээд шилмэл “эцэг” мал буюу хээлтүүлэгч малладаг хүнийг хариуцлагажуулахгүй бол “үхсэн, алга болсон” нэрээр үрэгдэж байна гэлээ.

Ийнхүү тэд үнэн бөгөөд үнэтэй олон зүйл хөндөн ярьцгаалаа.