Дэлхийн зах зээлийн амьд­ралд ч хүчтэй нөлөө үзүүлээд байсан Европийн орнуудын тэр дундаа Грекийн төсвийн өрийн хямралыг шийдэх чухал алхмыг өчигдөр Евро бүсийн тэргүүн нар гаргалаа. Бараг арван цаг үргэлжилсэн хүнд хэцүү хэлэл­цээ­ний дүнд энэ шийдвэрт хүр­сэн байна. Гурван талт гэрээ хэлбэ­рээр хийгдсэн энэхүү шийд­вэрийн дагуу Грек улсын өрийн тал хувийг зээлдүүлэгч талууд болох Европийн банкууд ийнхүү “цайруулахаар” болж байгаа юм байна. Энэ мэдэгдэл Европийн бүс нутгийн асуудалд санаа зовниж байсан хөрөнгө оруулагчдад итгэл найдварыг нь эргүүлэн өгч байгаа бөгөөд ингэснээр еврогийн ханш ч өсөж бэхжих магадлал гарч ирж байгаа аж.

Энэ мэдээг сонссоныхоо дараа Грекийн ерөнхий сайд Георгеос Папандреу хэлэхдээ энэ шийдвэр Грек улсад шинэ эрин үеийг нээж байна гэжээ. Грек улс гадаад өрийнхөө 50 хувийг тэглүүлснээр асуудлаа шийдэж санхүүгийн байдлаа тогт­вортой болгох асар том боломжийг олж байгаагийн дээр ихээхэн хэмжээний санхүүгийн дэмжлэг авахаар болж байна.  Олон улсын валютийн сан болон Европын холбооны зүгээс авах энэ санхүүгийн дэмжлэгийн хэмжээ 100 тэрбум еврогийн хэмжээтэй тэнцэж байгаа ажээ.

“Евро бүсийн орнуудын зүгээс гаргаж байгаа энэхүү хүчирхэг шийдвэр нь хүлээлт бий болгоод байсан дэлхий ний­­тийн санааг амрааж байна” гэж Францын ерөнхийлөгч Николя Саркози Брюссельд хий­­­­сэн хэвлэлийн бага хурал дээр хэлжээ. Евро бүсийн орнуу­дын санхүүгийн байдлаас эмээх болон тус бүс нутгийн нэгд­сэн мөнгөн тэмдэгтийн ирээдүйд заналхийлсэн нөх­цө­лөөс бол­гоом­жилсон хандлага нь сүүлийн саруудад зах зээлийг бү­хэлд нь сүйрүүлж ирсэн билээ.

Өнгөрсөн хугацаанд  шүүмж­­­­­лэгчдийн зүгээс шийдвэр гаргагч­дыг Евро бүсэд тулгараад байгаа санхүүгийн хямралын асуудлыг шийдвэрлэхийн тө­лөө ямар ч зүйл хийсэнгүй, мөн тодорхойгүй байдал бий болоход хүргэж улам өөгшүүл­сээр байна гэж зэмлэсээр ирсэн байдаг. Харин Евро бүсийн лидерүүд Грекийн санхүүгийн хямрал нь Итали зэрэг бусад Европын орнуудын эдийн зас­гийг нэрвэхээс өмнө аюулыг зай­луулахыг хичээсээр ирсэн бөгөөд энэ нь зах зээлийг тайвш­руулах хичээл зүтгэл болсоор ирсэн нь талаар болсонгүй.

Үүний зэрэгцээ тэд Европийн бүс нутгийг хямралаас аврах сангийн хүчин чадлыг нэмэгдүүлэхээр  төлөвлөж бай­­­­­­гаа ажээ. Европийн 17 ор­ны удирдагч нар цугласан Брюс­селийн уулзалтаас гаргаж бай­гаа бас нэг чухал шийдвэр нь Европийн санхүүгийн тогт­воржилтын сангийн одоо байгаа 440 тэрбум еврогийн хөрөнгийг 1 их наяд евро болгон өсгөхөөр болсон тохиролцоо юм. Ингэж өсгөх болсноор мөн санхүүгийн хямралын ирмэг дээр байгаа Итали, Испани зэрэг орны нөх­цөл байдалд хэрэгтэй үед нь дэмжлэг үзүүлэх боломж бүрдэх бололтой. Үүний зэрэгцээ 2012 оны дундуур гэхэд Европийн зах зээлд оролцоотой банкууд нийтдээ 106 тэрбум еврог хөрөн­гө оруулалтын зах зээл дээр дахин байршуулахаар болж байгаа аж.

Мөн Евро бүсийн лидерүүд өчигдөр гаргасан түүхэн чухал шийдвэрийнхээ нэг хэсэг болгож Европийн банкуудад хандан арил­­жаанд зориулан гаргаж байгаа мөнгөний хэмжээгээ ө­с­гөхийг уриалсан байна. Үү­ний зэрэгцээ Грекийн өрийн асуудлыг шийдвэрлэж байгаа тухай мэдээлэл гарсан даруйд дэл­хийн зах зээл дээр эерэг өөрчлөлтүүд гарч эхэлсэн байна. Тухайлбал, Азийн хөрөнгийн зах зээлийн үзүүлэлтүүд оргил өөд мацаж байгаа бөгөөд Японы биржийн үзүүлэлт 0.5 хувиар өссөн байна. Мөн еврогийн ам.доллартай харьцах ханш сүүлийн найман долоо хоногт гараа­гүй өндөр дүнтэй болоод байгаа гэнэ.