Аймгийн Засаг даргын Нийгмийн салбарт хэрэгжүүлж буй гурван тулгуурт бодлогын нэг болох хүүхэд багачуудын оюун ухааныг хөгжүүлэх, аймагтаа шатрын спортыг дэлгэрүүлэн хөгжүүлэх аян 2009 оноос хойш өдийг хүртэл хэрэгжсэн. Аяны үр дүн ч тодорхой гарч байгаа нь саяхны тэмцээнээс харагдаж байлаа. Аймгийн хэмжээнд ерөнхий болосролын сургуулийн 15000 гаруй хүүхэд байдаг бөгөөд эдгээрийн 11300 нь аяны хүрээнд шатар тоглож сураад байна. Ийнхүү 999 шатарчин хүүхдийн аймгийн аварга шалгаруулах тэмцээнийг Монгол Улсын тэргүүн Шадар сайд Н.Алтанхуягийн ивээл дор амжилттай зохион байгууллаа.

Энэ Шадар сайд Н.Алтанхуяг хүүхдүүдийн сэтгэгдлийг сонсч, баяр хүргэсэн бөгөөд Олон улсын хэмжээний мастер, гавьяат дасгалжуулагч П.Жигжидсүрэн багш аймгийн аварга шалгаруулах тэмцээнд оролцож буй 24 сумын 24 шилдэг шатарчин хүүхэдтэй нэгэн зэрэг тоглолт хийсэн юм. Тэмцээний 16-18 насны ангиллын эрэгтэй шатарчдаас алтан медалийг Улиастай сумын “Дэвшил” сургуулийн сурагч Намхайнямбуу, мөнгөн медалийг Баянтэс сумын сурагч Пүрэвдаваа нар хүртсэн бол эмэгтэй шатарчдаас алтан медалийг Түдэвтэй сумын сурагч Чулуунчимэг, Баянхайрхан сумын сурагч Мэндбаяр мөнгө, Сонгино сумын сурагч Лхагважаргал хүрэл медаль хүртлээ.