Афганистаны ерөнхийлөгч Хамид Карзай үндэсний телевизээрээ мэдэгдэхдээ Пакистан, АНУ-ын хооронд цэргийн сөргөлдөөн гарвал Кабул Пакистаныг дэмжинэ гэж мэдэгджээ. Афганы ерөнхийлөгч Карзай тус орны ерөнхийлөгч агсан Бурхануддин Раббанийг Пакистаны Засгийн газартай холбоотой “Хаккани” бүлгийнхэн хөнөөсөн гэсэн мэдээлэл гарсны дараа энэхүү мэдэгдлээ хийв.
“Пакистан АНУ-ын хоёрын хооронд дайн бүү гараасай, бурхан минь. Хэрэв дайн гарвал бид Афганистан улс Пакистаны талд орно” гэсэн Карзайн үгийг CBS News дамжуулсан байв. Ер нь бол Пакистан ямар нэгэн улсын халдлагад өртөх эсвэл тусламж хэрэгтэй бол Кабул нэн даруй туслах болно гэж Карзай онцлов. “Афганчууд та нартай хамт байх болно. Афганистан бол та нарын ахан дүүс” гэж Карзай хэлэв. Пакистаны ард түмнээс афганчуудад хандсан хүндэтгэлтэй, найрсаг харилцааг афганчууд хэзээ ч мартахгүй. Пакистан бол хэзээ ч өөрийн ахан дүүсээ орхиж байгаагүй гэдгийг тэрээр сануулжээ.
Пакистантай холбоотой “Хаккани” бүлэг өнгөрсөн есдүгээр сард Элчин сайдын яамд байрладаг дүүрэгт хүчтэй довтолгоон хийсэн мөн Афганы ерөнхийлөгч агсан Бурхануддин Раббанийг хөнөөсөн хэрэгт буруутгагдаж байгаа юм.