Дөрвөн их ой давхацсан өнөө жилийн баяр наадмын хүчит бөхийн барилдаанд 10 даван түрүүлж, Монгол Улсын аварга цол хүртсэн С.Мөнхбатын цолны хүндэтгэлийн мялаалга өнгөрөгч пүрэв гаригт “Улаанбаатар” ресторанд болов. Увс аймгийн Баруунтуруун сумын харьяат отгон аваргын найранд 600-гаад зочин хүрэлцэн ирж, “Улаанбаатар” ресторан хөл эргэх зайгүй шахам болтлоо дүүрсэн байлаа. Зочдын дунд мэргэжлийн сумо бөхийн их аварга Асашёорюү Д.Дагвадорж хүндтэй байр суурь эзэлж байлаа.

Нэгэн үе мэргэжлийн сумо бөхийн дэвжээг эзэгнэж, аатай барилдаан, уран мэхээрээ Японы үндэсний бөхийн дэвжээг хотолзуулж явсан их аварга өнөө жилийн түүхт ойн баяр наадмын түрүү бөх,  улсын отгон аварга дүүгээ 10 мянган “ногоон”-оор байлжээ. С.Мөнхбат аварга мөн цолны найрандаа их аварга Хакухо М.Даваажаргалыг урьсан ч Японд ирэх башёгийн бэлтгэлдээ ороод буй ёкозуна хүрэлцэн ирж чадаагүй аж. Гэхдээ Хакухо Японоос бэлэг сэлтээ илгээж, халхын залуу аваргад амжилт хүссэн гэнэ лээ.