Эмэгтэйчүүдийн футзалын аваргууд тодорлоо

Монголын хөлбөмбөгийн холбооноос хоёр дахь жилдээ зохион байгуулсан Олон улсын эмэгтэйчүүдийн баярын өдөрт зориулсан охид, эмэгтэйчүүдийн футзалын аварга шалгаруулах тэмцээн энэ сарын 4-6-ны хооронд “Мон-Алтиус” БТДС-ийн зааланд боллоо. U-13, U-15, U-17 болон 18-аас дээш гэсэн дөрвөн насны ангиллаар зохиогдсон тус тэмцээнд 26 багийн 300 гаруй тамирчид өрсөлдөж, аваргуудаа тодруулсан байна. Тэмцээний нээлтийн ёслолын ажиллагаанд МХБХ-ны Ерөнхий нарийн бичгийн дарга Д.Тэрбаатар, Удирдах зөвлөлийн гишүүн Д.Ганбат, МХБХ-ны Техникийн захирал И.Отгонбаяр нарын төлөөлөгчид оролцсон бөгөөд нээлтийн ажиллагааны үеэр “Тэнгэр даатгал” компаниас тэмцээнд оролцож буй бүх тамирчдад 300 сарнай цэцгээр бэлэг барьжээ.

Тэмцээний 13-аас доош насны ангилалд 4, U-15 ангилалд 6, U-17 ангилалд 7, харин 18-аас дээш насны ангилалд 9 баг оролцсон бөгөөд хамгийн залуу оролцогч нь “Эрчим” багийн 11 настай тоглогч Х.Рэгзэдмаа, харин хамгийн ахмад тоглогч нь “Хад” багийн 38 настай Ц.Ганбат нар байлаа.

Тэмцээний медальтнууд:

U-13 насны ангилалд:
Алт: Ц.Ганболд дасгалжуулагчтай “Соёмбын барсууд”
Мөнгө: Б.Эрдэнэбат дасгалжуулагчтай “Сод титэм”

U-15 насны ангилалд:
Алт: Д.Чулуунболд дасгалжуулагчтай “UB United”
Мөнгө: Б.Эрдэнэбат дасгалжуулагчтай “Сод титэм”
Хүрэл: Б.Зориг дасгалжуулагчтай “Багануур”

U-17 насны ангилалд:
Алт: Б.Эрдэнэбат дасгалжуулагчтай “Сод титэм”
Мөнгө: Д.Батнасан дасгалжуулагчтай “Эрчим”
Хүрэл: Н.Мөнхтуяа дасгалжуулагчтай “Сүхбаатар”

18-аас дээш насны ангилалд:
Алт: Б.Мөнхжаргал дасгалжуулагчтай “Хад”
Мөнгө: Б.Бадамсэд дасгалжуулагчтай “МУБИС-2”
Хүрэл: Д.Анхбаяр дасгалжуулагчтай “МУБИС-1”