Улсын драмын эрдмийн театрын уран бүтээлчид өнөөдөр хөдөө орон нутгийн үзэгчдийг зорилоо. Өнөөдрөөс эхлэн энэ сарын 15-н хүртэл “Улсын драмын эрдмийн театрын өдрүүд” Сэлэнгэ аймагт  үргэлжлэх юм. Тус театрын уран бүтээлчид жилд 2-3 аймагт аялан тоглолтоо тогтмол хийж, орон нутгийн иргэдийн талархлыг хүлээгээд байгаа билээ. Энэхүү уламжлалт ажлыг өнгөрсөн жил  Өмнөговь, Архангай, Булган аймгийн ЗДТГ-уудтай хамтран  амжилттай зохион байгуулсан билээ.  

Энэ удаагийн аялан тоглолтод Д.Мэндсайханы “Ээжээ” уянгын драм, Ц.Балдоржийн “Шөнө амталсан нулимс” жүжиг, Ш.Гүрбазар “Надаар тоглосон хайр” драмын жүжиг, С .Михиалков “Бардам туулай” хүүхдийн жүжиг зэрэг драмын шилдэг уран бүтээлүүдээ нас насны үзэгчдэд зориулан  тоглохоор өнөөдөр замд гарлаа.

Аялан тоглолтын бүрэлдэхүүнд театрын удирдлагуудаас гадна ардын жүжигчин Г.Мягмарнаран, төрийн соёрхолт, ардын жүжигчин Н.Сувд, П.Цэрэндавга, гавьяат жүжигчин С.Сарантуяа, С.Дамдин, Б.Жаргалсайхан, У.Уранчимэг, соёлын тэргүүний ажилтан Н.Наранбаатар, С.Болд-Эрдэнэ, Г.Амгаланбаатар, Д.Ганцэцэг, Б.Отгонбат  зэрэг  40 гаруй  уран бүтээлчдээс бүрдсэн баг  орон нутгийн зорилоо.