Өнөөдөр Монгол шуудан банкны үүсгэн байгуулагч, жижиг хувь нийлүүлэгч нарын төлөөлөл болох Ц.Балжинням, Н.Батсайхан, А.Минж, Л.Цэцгээ нарын хүмүүс хэвлэлийнхэнд мэдээлэл хийлээ. Тэд энэ сард Монгол шуудан банкны хувь нийлүүлэгчдийн хурлыг хийхээр зарласан нь хууль зөрчсөн үйлдэл гэж үзэж байгаагаа энэ үеэр мэдэгдсэн юм. Тэд хэлэхдээ,  “Монгол шуудан банкны хувьцаа эзэмшигч болох МонголшШуудан  банкны гүйцэтгэх захирал асан Д.Оюунжаргал, түүний ах Монгол Шуудан банкны төлөөлөн удирдах зөвлөлийн дарга асан, УИХ-ын гишүүн Д.Зоригт, түүний эхнэр Д.Оюунсүрэн нарын таван хүн бусад хувьцаа эзэмшигчдэдээ мэдэгдэлгүй өөрсдийн хяналтад байсан багц хувьцаагаа “Хадгаламж” банкинд 2009 оны есдүгээр сард худалдсан байсан. Харамсалтай нь, энэ тухайгаа тэд бусад хувьцаа эзэмшигч нарт аравдугаар сард мэдэгдэж, хувьцаа эзэмшигчдийн хурал нэртэй хууль бус хурал хийж, шийдвэр гаргасан. Дараа нь хувьцаа авах, худалдан авах энэ үйлдэл  хууль зөрчсөн учир Монгол банкнаас зөвшөөрөл олгоогүй.

 Гэтэл нэгэнт Монголбанкнаас зөвшөөрөл олгоогүй байхад 2009 оны аравдугаар сард хэвлэлийн бага хурал зарлаж, Хадгаламж банк нь “Монгол Шуудан” банкны хяналтын багцийг авч хоёр банкийг нэгтгэх болсон тухай мэдээллэсэн нь олон түмний ойлголтыг төөрөгдүүлсэн жүжиг байсан. Улсын Дээд шүүхээс “Монгол Шуудан”, “Хадгаламж” гэх хоёр банкийг нэгтгэх ажиллагааг хууль зөрчсөн гэж үзээд Монгол Шуудан банкны хувь нийлүүлэгчдийн 2009, 2010 оны хурлын шийдвэрүүдийг хүчингүй болгосон байтал жижиг хувь нийлүүлэгчид ногдол ашгаа авч чадахгүй өдийг хүрч байна” гэлээ. Хурал зохион байгуулагчид энэ үеэр мөн хоёр жилийн өмнө “Хувьцаа чинь ямарч үнэгүй цаас боллоо” гэдэг жүжигт хууртаж, хувьцаагаа зарсан бусад 60 гаруй хувь нийлүүлэгчдийгээ өөрсөдтэй нь нэгдэж, хууль зөрчсөн этгээдүүдийн үйл ажиллагааг зогсооход оролцохыг уриалж байлаа.

 “Монгол шуудан” банкны үүсгэн байгуулагч, жижиг хувь нийлүүлэгч Н.Батсайхан хэлэхдээ, “УИХ-ын гишүүн Д.Зоригт гэж хүн Монгол Улсын хөрөнгийн бодлогоор тоглож байна. Түүний хөрөнгө сая саяар өсч, 11 тэр бум боллоо. Тэгтэл жижиг хувь нийлүүлэгч нарт нэг ч ашиг хүртээгээгүй. Д.Зориг нарын таван хүний ногдол ашиг 35-40 хувиар өсдөг бол жижиг хувь нийлүүлэгч бидний ноогдол ашиг 5 хувиар өсдөг байх жишээтэй” хэмээн онцолж байлаа.