Хууль зүй, дотоод хэргийн сайд Ц.Нямдорж өчигдөр Монгол Улс болон БНХАУ-ын хооронд Ялтан шилжүүлэх гэрээ байгуулах асуудлыг УИХ-аар соёрхон батлуулах гэрээний төсөл болон Хүн худалдаалахтай тэмцэх тухай хуулийн төслийг УИХ-ын даргад өргөн барив. БНХАУ-д ял эдэлж байгаа Монгол Улсын иргэдийг эх оронд нь шилжүүлэх асуудлаар хоёр улсын холбогдох байгууллагын албан тушаалтнууд 2005 оноос хойш удаа дараа уулзалт зохион байгуулан санал солилцсон байна. Хоёр орны хооронд албан ёсоор гэрээ байгуулаагүй боловч хамтын ажиллагааны үр дүнд БНХАУ-ын нэг иргэнийг эх оронд нь шилжүүлэх, Монгол Улсын хоёр иргэнийг эх нутагт нь авчирсан байна.

Мөн Цагдаагийн байгууллагын тухай хуульд нэмэлт өөрчлөлт оруулах хуулийн төслийг өргөн мэдүүлсэн юм. Хуулийн төсөлд тусгаснаар Нийтийг хамарсан эмх замбараагүй байдлын улмаас нийгмийн хэв журам алдагдсан тохиолдолд цагдаагийн байгууллага үүссэн нөхцөл байдлыг өөрийн бие бүрэлдэхүүн, хүч хэрэгслээр зохицуулах боломжгүй болсон нөхцөлд цагдаагийн байгууллагын дарга, хууль зүй, дотоод хэргийн асуудал эрхэлсэн Засгийн газрын гишүүний саналаар, Засгийн газрын шийдвэрийн үндсэн дээр цагдаа, тагнуул, хил хамгаалах, онцгой байдал, шүүхийн шийдвэр гүйцэтгэх байгууллага болон дотоодын цэргийн хамтран ажиллах эрх зүйн үндэслэлийг хуулийн төслүүдэд нарийвчлан тусгаж өгсөн юм байна.