УИХ-ын Байгаль орчин, хүнс хөдөө аж ахуйн байнгын хорооны хуралдаанаар өнөөдөр Газрын тухай хуулийн төслийг орон нутагт хэлэлцүүлсэн талаарх мэдээлэл сонслоо. Уг хуулийн төслийг УИХ-ын хаврын чуулганаар хэлэлцэх болоход гишүүд “Газрын тухай хууль нь иргэдэд хамгийн их хамааралтай учраас иргэдээр хэлэлцүүлж байж, дараа нь УИХ-аар хэлэлцэх ёстой” гэж үзэж, хэлэлцүүлгийг хойшлуулсан юм. Ингэснээр Зам, тээвэр барилга хот байгуулалтын яамныхан дээрх хуулийн төслөөр иргэдийн дунд хэлэлцүүлэг өрнүүлж, санаа бодлыг нь тусгах үүрэг авсан. Энэ дагуу яамны зүгээс өнгөрсөн хугацаанд орон нутаг болоод Улаанбаатар хотын хэмжээнд хэлэлцүүлэг өрнүүлж, мөн хэвлэл мэдээллээр төслийн талаар хангалттай мэдээлэл цацсан гэж мэдээлэл хийх үеэрээ онцоллоо.

Мөн хуралдаанаар Ховордсон амьтан ургамал, тэдгээрийн гаралтай эд зүйлийн гадаад худалдааг зохицуулах тухай хуульд нэмэлт, өөрчлөлт оруулах тухай хуулийн төслийг хэлэлцээд олонхийн саналаар “Хэлэлцэх нь зүйтэй” хэмээн үзлээ.