Японы нийслэл Токио хотноо өнгөрөгч амралтын өдрүүдэд “Tokyo Open” жиу-жицу бөхийн олон улсын тэмцээн боллоо. Тус тэмцээнд Монголын баг тамирчид Ё.Зоригтбаатар /эрэгтэй, 76 кг/, О.Болд-Эрдэнэ /эрэгтэй, 81 кг/, Г.Дашдаваа /эрэгтэй, 94 кг/, Б.Ариун-Эрдэнэ /эрэгтэй, 100 кг/, Б.Энхчимэг /эмэгтэй, 60 кг/, Б.Сугар /эмэгтэй, -74 кг/ нарын зургаан тамирчны бүрэлдэхүүнтэй оролцсоноос Хил хамгаалах ерөнхий газрын харьяа “Хилчин” спорт хорооны тамирчин О.Болд-Эрдэнэ эрэгтэйчүүдийн 81 кг-ын жинд аваргалжээ. Тэрбээр мөн үнэмлэхүй жинд зодоглож, түрүүлснээр “Tokyo Open” тэмцээнээс хос алтан медаль хүртсэн байна.

Дашрамд дуулгахад, Монголын жиу-жицу, бүстэй барилдааны холбооноос өсвөр үеийн анхдугаар, насанд хүрэгчдийн улсын аварга шалгаруулах хоёр дахь удаагийн тэмцээнийг ирэх сард зохион байгуулах гэж байна.