Нийслэлийн Онцгой байдлын газарт сүүлийн гурван хоногийн хугацаанд обьектын гал түймрийн 19 дуудлага, Шуурхай бүлэг 105-д хоёр удаагийн дуудлага иргэдээс иржээ.  Обьектын гал түймрийн нийт дуудлагаас автомашин, өвс, гэр, байшин шатсан зэрэг дуудлагууд ирсэн байна. Мөн  сүүлийн үед тус газарт автомашины эд анги шатсан гэх дуудлагууд ирэх болжээ.   Тухайлбал, Баянзүрх дүүргийн 17 дугаар хороо Эмнэлгийн  гудамжинд “Ниссан санни” загварын  суудлын автомашины хөдөлгүүрийн хэсэг, Сонгинохайрхан дүүргийн есдүгээр хороо Малчины гудамжинд  “Акксент” загварын суудлын автомашины зорчигчийн хэсэг,  Хан-Уул дүүргийн тавдугаар хороо, Яармагийн гудамжинд  “Sonata II” загварын суудлын автомашины хөдөлгүүр, дотор бүхээгийн хэсэг шатаж байсныг  тус тус унтраасан байна. 

Хүйтний улиралд техник хэрэгслийн аюулгүй байдлыг хангаагүйгээс, мөн иргэдийн болгоомжгүй үйлдлээс  автомашин шатах тохиолдол ийнхүү гардаг. Иймд тээврийн хэрэгслийн бүрэн бүтэн байдал, аюулгүй ажиллагааг хангаж автомашины  эд ангиудын цахилгаан холболтыг тогтмол шалган,  тээврийн хэрэгслээ  бамбардаж асаах, паяальникаар гэсгээх, газаар халаах зэрэг үйлдэл хийхгүй байхыг НОБГ-оос анхаарууллаа. Мөн амралтын өдрүүдэд хээрийн өвс шатсан хоёр ч дуудлага ирсэн байна.Сонгинохайрхан дүүргийн 24 дүгээр хорооны оршин суугч хашааныхаа  хогыг шатааж байгаад гал алдаж 0,8 га талбайд хээрийн өвс шатаж байсныг Аврах, гал унтраах 29 дүгээр ангийн тасаг, Налайх дүүргийн Лан өндөр хайрхан гэдэг газар гал түлж гал алдсанаас 5 га талбайд хээрийн өвс шатаж байсныг  Аврах, гал унтраах 28 дугаар ангийн  тасаг унтраажээ.