Өнгөрсөн есдүгээр сарын 27-28-нд Төвийн бүсийн цахилгаан дамжуулах сүлжээний Дархан-Сэлэнгэ аймгуудын бүс нутагт цахилгаан дамжуулах агаарын шугамын дамжуулагч утсанд мөсжилт үүссэнээс дамжуулагч утас тасарч, тулгуур хугарч унасан гэмтэл гарсан байна. Энэ нь бороо нойтон цас холилдон орж шуурсны улмаас болсон бөгөөд 110 болон 220 кВ-ийн нийт 21 тулгуур шугам хугараад байсан юм. Гэмтлийн улмаас Сэлэнгэ аймгийн Орхон, Хөтөл сум, Хар төмөрлөгийн үйлдвэр, Дарханы үйлдвэрийн район, Ерөө, Бугант, Толгойт, Баянгол, Болд төмөр ерөө гол-дэд станцын хэрэглэгчид цахилгаан эрчим хүчээр хязгаарлагдаад байсан билээ.
Энэ сарын 28-ны өдөр Эрдэс баялаг, эрчим хүчний сайд Д.Зоригт болон “Төвийн бүсийн цахилгаан дамжуулах сүлжээ” ХК-ийн гүйцэтгэх захирал Э.Түвшинчулуунаар ахлуулсан ажлын хэсгийнхэн газар дээр нь очиж ажиллан Дархан болон Сэлэнгэ аймгийн төвүүдийг эрчим хүчээр шуурхай хангах ажлыг зохион байгуулжээ. Ослын газар дээр ажиллаж байгаа Төвийн бүсийн цахилгаан дамжуулах сүлжээ компанийнхан өчигдөр 20 цагт Сэлэнгэ аймгийн Ерөө болон Хөтөл сумыг эрчим хүчтэй холбосноор уг гэмтлийн улмаас цахилгаангүй болоод байсан хэрэглэгчдийг цахилгаанаар бүрэн хангасан байна.