Монголын волейболын холбооноос зохион байгуулдаг залуучуудын улсын аварга шалгаруулах тэмцээн энэ жил “Гоё кап” нэртэйгээр зохион байгуулагдах гэж байна. 10 дахь жилдээ зохион байгуулах залуучуудын УАШТ-ийг “Витафит” компани ивээн тэтгэх ажээ. Тэмцээнийг нээлттэй хэлбэрээр зохион байгуулж байгаа учир 17-22 насны тамирчдаар багаа бүрдүүлсэн нийслэл, хот хөдөөгийн бүхий л баг тамирчид улсын аваргад өрсөлдөх боломжтой юм байна. Түүнчлэн Монголын волейболын үндэсний лиг одоогоор сонирхогчийн статустай, мэргэжлийн төвшинд хүртлээ хөгжөөгүй байгаа тул дээд лигт харьяалалтай багийн 17-22 насны тамирчид залуучуудын улсын аваргад оролцох боломжтой гэнэ. Тэмцээн энэ сарын 1-нд Спортын төв ордонд эхэлнэ. Харин Монголын волейболын үндэсний лигийг энэ сарын сүүлээр эхлүүлэхээр төлөвлөөд байгаа ажээ. Одоогоор заалны асуудал бүрэн шийдэгдээгүй байгаа тул тэмцээний тов тодорхойгүй байгаа гэнэ.