Ардчилсан намын ҮЗХ-ны хурал энэ сарын 9-нд буюу нөгөөдөр хуралдах юм. Ардчилсан намын дотоод дүрмэнд зааснаар намын эрх барих дээд байгууллага болох ҮЗХ буюу Үндэсний зөвлөлдөх хорооны гишүүдийн дунд жил бүр ротаци явуулж, нийт гишүүдийн гуравны нэг буюу 72 хүнийг ээлжит бус сонгууль явуулж шинэчилж байх дүрэмтэй.

Харин энэ удаа ҮЗХ-ын гишүүдийн дунд ротаци явуулахгүй байх саналыг ҮЗХ-ны гишүүд гаргаж 140 гаруй гишүүний гарын үсэг цуглуулж АН-ын дарга Н.Алтанхуягт саналаа хүргүүлсэн байна. Үүний дагуу намын удирдлага асуудлыг авч үзээд гишүүдийн дунд ротаци явуулахгүй байх хүсэлтийг ямартай ч эхний ээлжинд хүлээж авчээ. Харин энэ асуудал нь АН-ын удирдлага болон УИХ дахь АН-ын гишүүдтэй ямар ч холбоогүй гэж АН-ын ерөнхий нарийн бичгийн дарга Д.Эрдэнэбат мэдээллээ.