Гэмт хэргийн хохирогчдын гар утсыг хакердсан нь тогтоогдож, олныг цочирдуулсан  Британийн өдөр тутмын хамгийн том хэвлэл “News of the World” өнгөрсөн долдугаар сард хамгийн сүүлчийн дугаараа гаргасан. Британийн хэвлэлийн  магнат Руферт Мурдокийн “News International” компани гар утсыг нь хакердсаны төлөө гэмт хэргийн хохирогч насанд хүрээгүй охины гэр бүлийнхэнд нөхөн олговор олгохоо мэдэгдсэн байна. “News International” мэдэгдэлдээ “Хохирогчийн гэр бүлийнхэнтэй уулзаж, зөвшилцөлд хүрсний эцэст тэдний хүссэн нөхөн олговрыг олгох болсон” гэжээ. “Sky News”-ийн мэдээлж буйгаар тус компани хохирогчийн гэр бүлд хоёр сая фунт стирлингийн нөхөн олговор олгож, мөн нэг сая фунт стирлингийг хандивын үйлст зориулах гэнэ. Хохирогчийн гэр бүлийн өмгөөлөгч харин дээрх мэдэгдэлд ямар нэгэн тайлбар хийгээгүй байгаа юм байна.

“News of the World” сонин 2002 онд сураггүй алга болсон 13 настай охины дуут мессежийг хакердсан нь Британичуудыг цочирдуулж, Мурдокийн медиа вант улсын өндөр албан тушаалтнууд албан тушаалаасаа огцорсон билээ. Сонин алга болсон охины дуут мессежийг хакердаж, зарим мессежүүдийг устгаж,  гэр бүлийнхэнд нь хоосон итгэл найдвар төрүүлж, мөрдөн байцаалтыг төөрөгдүүлснийхээ  төлөө уучлал гуйсан юм. Алга болсон охин алуулсан нь дараа нь тогтоогдсон билээ. Охиныг шөнийн клубын хаалгач эр хөнөөснийг цагдаа нар илрүүлсэн байна. Өнгөрсөн долдугаар сард “News of the World”-ын эзэн 80 настай  Руферт Мурдок хохирогчийн гэр бүлийнхнээс өөрийн биеэр уучлал гуйсан юм. Британийн хамгийн их борлуулалттай  “News of the World”  сонин урлаг спортын алдартнууд болон хатан хааны гэр бүлийнхний гар утас, е-мэйлийг хакердсан нь тогтоогдсоны дараа Руферт Мурдок сонины хэвлэлтийг зогсоосон юм.