ДАШТ-ий сонгомол бөх болон эмэгтэй, чөлөөт бөхийн тэмцээн өндөрлөж, аваргууд тодорсон ба өнөөдөр эрэгтэй, чөлөөт бөхийн 60, 84, 96 кг-ын жингийн барилдаан болж байгаа юм.
Эрэгтэйчүүдийн 60 кг-д эх орноо төлөөлсөн Азийн наадмын аварга, ОУХМ Г.Мандахнаран эхний тойрогт Өмнөд Солонгосын бөх И Сюн-Чулд 0:2, 0:1 харьцаатай ялагдсан. Манай бөхийг ялсан БНСУ-ын тамирчин хоёрдугаар тойрогт Египетийн бөхийг ялсан ч удаахь барилдаандаа Пуэрто-Рико улсын бөхөд дийлдсэн учир Г.Мандахнаран дагах барилдаанд зодоглох боломжгүй болсон юм.
Харин 84 кг-д ОУХМ П.Өсөхбаатар эхний тойрогт хийлсэн ч хоёрдугаар тойргийн барилдаанд Пуэрто-Рикогийн тамирчин Жейми Юсеф Эспиналд 1:5, 1:2 харьцаатай ялагдсан бол 96 кг-ын жинд ОУХМ Н.Золбоо эхний тойрогт Мексикийн бөх Силва Риосыг 3:0, 0:1, 1:0 оноогоор ялсан ч хоёрдугаар тойрогт Словакийн Жозеф Яловиарт 0:6, 3:0, 1:0 харьцаатай дийлджээ.
Маргааш буюу дэлхийн аваргын сүүлийн өдөр эрэгтэй, чөлөөт бөхийн 66, 74 болон 120 кг-ын жинд аваргууд тодорно. Эдгээр жинд Монголын багаас Б.Батзориг /66 кг/, П.Өнөрбат /74 кг/, Ж.Чулуунбат /120 кг/ нар барилдах юм.