Катарын нийслэл Доха хотноо FIDE-гийн шилдэг 12 эмэгтэй шатарчны оролцсон эмэгтэйчүүдийн гран-при тэмцээний зургаа дахь цуврал өчигдөр өндөрлөлөө. Шилдгүүдийн халз тулаанд Энэтхэгийн их мастер Хампи Конеру, Болгарын Антоанета Стефанова, Шведийн Пия Крамлин, Гүржийн Нана Загнизе, Майя Чибурданизе, Францын Мэри Себаг, Катарын Чжу Чень, Армяны Елина Даниельян, Лилит Мкртчьян, Хятадын Сью Юйхуа, Эквадорын Марта Фьерро нарын хамт Монголын их мастер Б.Мөнгөнтуул өрсөлдсөн юм. Тэмцээн өнгөрсөн сарын 22-нд эхэлж, шатарчид нийт 11 өрөг тоглосон бөгөөд Б.Мөнгөнтуул дөрөв хожиж, хоёр тэнцэж, тав хожигдсоноор нийт таван оноотой наймдугаарт бичигдлээ. Харин дэлхийд чансаагаараа хоёрдугаарт бичигдсэн Энэтхэгийн их мастер Хампи Конеру зургаа хожиж, дөрөв тэнцэж, нэг хожигдсоноор 8 оноотой тэмцээнийг тэргүүлсэн байна.

Өнгөрсөн намар Улаанбаатар хотод “Их тэнгэр” цогцолборт болсон гран-при тэмцээний тав дахь цувралд Б.Мөнгөнтуул 11 дүгээр байрт шалгарч байсан бол энэ удаагийн шилдгүүдийн тулаанд манай шатарчин өмнөх амжилтаа ахиулж, наймдугаар байрт бичигдлээ. Эмэгтэйчүүдийн гран-при тэмцээний дараачийн цуврал дөрөвдүгээр сарын 16-30-ны хооронд ОХУ-ын Налчик хотноо болно.

Б.Мөнгөнтуулын тоглолтуудын дүн:
1. Майя Чибурданизе /Гүрж/ 0-1 Б.Мөнгөнтуул
2. Нана Загнизе /Гүрж/ 1-0 Б.Мөнгөнтуул
3. Б.Мөнгөнтуул 0-1 Елина Даниельян /Армян/
4. Сью Юйхуа /Хятад/ 1-0 Б.Мөнгөнтуул
5. Б.Мөнгөнтуул 0,5-0,5 Лилит Мкртчьян /Армян/
6. Чжу Чень /Катар/ 0-1 Б.Мөнгөнтуул
7. Б.Мөнгөнтуул 0-1 Хампи Конеру /Энэтхэг/
8. Марта Фьерро /Эквадор/ 1-0 Б.Мөнгөнтуул
9. Б.Мөнгөнтуул 1-0 Пия Крамлин /Швед/
10. Антоанета Стефанова /Болгар/ 0,5-0,5 Б.Мөнгөнтуул
11. Б.Мөнгөнтуул 1-0 Мэри Себаг /Франц/