Двайт Ховардын Монгол дахь аяллын ивээн тэтгэгч, зохион байгуулагчдын нэг “Eznis Airways” компани энэ удаад Avro RJ-87 загварын тийрэлтэт хөдөлгүүртэй, хөдөө орон нутагт нислэг үйлддэг онгоцтойгоо асрамжийн төвийн хүүхдүүдийг танилцуулсан. Аяллын үеэр Ховард хүүхдүүдтэй хамт онгоцонд үдийн зоог барьж, чөлөөт сэдвээр, бага насныхаа талаар багачуудтай яриа өрнүүлсэн. Тэрбээр бага байхдаа тийм ч алдартай бус жижигхэн сургуульд суралцдаг байснаас гадна хэдийгээр жижиг биетэй байсан ч NBA-ын тоглогч болох чин хүсэл мөрөөдөлтэй байсан тухайгаа хуучлав. Двайтын ойр дотнынхон, найз нөхөд нь түүний энэ мөрөөдлийг үгүйсгэдэг байсан ч уйгагүй хөдөлмөрлөж, мөрөөдлийнхөө төлөө цуцашгүй тэмцсээр бага насны чин хүслээ биелүүлж, өнөөгийн хэмжээнд хүрсэн тухайгаа ярьсан юм. Хүүхдүүд ч түүний яриаг амтархан сонсч сууна лээ.