“Хэлмэгдэгсэдийн дурсгалыг хүндэтгэх өдөр”-ийг /Есдүгээр сарын 10/ угтан Хан-Уул дүүрэгт харъяалагддаг 145 хэлмэгдэгсэд тэдгээрийн гэр бүл, үр хүүхдүүдэд хүндэтгэл үзүүлж, тэдэнд дутагдалтай төрийн үйлчилгээг үнэ төлбөргүй, дараалалгүй үзүүлэх өдөрлөг зохион байгуулж байна. Жил бүрийн энэ өдөр дүүргийн Иргэдийн төлөөлөгчдийн хурал, Засаг даргын тамгын газраас эдгээр хүмүүст хүндэтгэлж үзүүлж, хүлээн авч уулздаг билээ. Харин энэ удаа тус өдрийг угтан тэдэнд ямар төрийн үйлчилгээ дутагдалтай байгаа болон түүнийг шийдвэрлэх тал дээр анхааран ажиллаж байгаа нь урьд жилүүдийнхээсээ онцлог болж байна.  
Түүнчлэн Цагаатгах ажлыг зохион байгуулах дүүргийн салбар комисс энэ жил олон ажлыг зохион байгуулжээ. Тухайлбал Улс төрийн хилс хэрэгт хэлмэгдэгчдийг цагаатгах, тэдэнд нөхөн олговор олгох тухай хуулийн 6 дугаар зүйлд зааснаар гомдол гаргах хугацаа энэ оны 12 дугаар 30-нд дуусгавар болж байгаатай холбогдуулан Улсын комисст өргөх бичиг хүргүүлсэн байна. Уг өргөх бичгээр дамжуулан хэлмэгдэгсэд болон тэдний гэр бүл, үр хүүхдүүдэд нөхөн олговор болгож, байр олгохыг хүссэн байна.  Мөн тус өдрийг угтан дүүргийн ИТХ-ийн дарга Д.Батбилэгийн дэмжлэгтэйгээр 1937-1939 онуудад хэлмэгдэж байсан, хуучнаар Аж үйлдвэрийн комбинатын иргэдийн тухай түүхэн ном гаргажээ.