![](https://news.mn/wp-content/archive2/biznes/photo/2010/6/e321cf75f48626e6/6f186ae5728a6e3fbig.jpg)
Одоогийн байдлаар Украйны Ерөнхийлөгч Виктор Янукович “Нафтогаз”-ын хувьцааг “Газпром”-д бэлэглэх бодолгүй байгаагаа мэдэгдсэн. Өнгөрсөн долоо хоногт хоёр орны төлөөлөгчид шинэ гэрээ байгуулах тухай хэлэлцсэн билээ. Түүний дараа В.Янукович “Интер Факс” агентлагт өгсөн ярилцлагадаа “Ийм санал тавьснаараа биднийг басамжилж байна. Хэрэв “Нафтогаз”-ын хувьцааг “Газпром”-д өгөхөөр болбол энэ нь украйнчуудын хувьд маш том доромжлол болно. Тиймээс би энэ саналыг хэрхэвч зөвшөөрөхгүй” гэжээ. Европын холбооны төлөөлөгчдийн хувьд Украйнтай чөлөөт худалдааны гэрээ байгуулах замаар “Нафтогаз” тэргүүтэй газрын тосны компаниудын үйл ажиллагаанд нөлөөлөхийг зорьж байгаа гэх таамаг гарсан байна.
Украйн бол ОХУ-тай олон жилийн турш байгалийн хийн салбарт хамтарч ажилласан орон. Гэхдээ Ю.Тимошенког Ерөнхий сайд байх үед 2009 онд энэ асуудал нэлээд шуугиан тарьж байв. Тухайн үед Украйны нутаг дэвсгэр дээгүүр дамжин өнгөрдөг тээвэрлэх хоолойн үйл ажиллагааг зогсоосноос болж ОХУ-аас гарах байгалийн хийн экспорт тасалдахад хүрсэн юм. Ерөнхий сайд асан Ю.Тимошенко Оросын талыг Украйнд нийлүүлж буй байгалийн хийн үнээ бууруулахыг шаардаж байв. Ю.Тимошенко бол америкчуудын дэмжлэгтэйгээр зохион байгуулсан гэх Жүржийн хувьсгалаар Украйнд төрийн эргэлт хийж, засгийн эрхэнд гарсан улстөрч. Түүнийг Ерөнхий сайд болсны дараа Украйны эрчим хүчний бодлогод өөрчлөлт орж, украйнчууд орос ах нарын өөдөөс “том дуугарах” болсон юм. Харин өнгөрсөн онд болсон сонгуулиар Ю.Тимошенкогийн нам ялагдал хүлээж, түүний оронд “Москвагийн утсан хүүхэлдэй” хэмээн барууны хэвлэлүүдээр бичигдэж байсан В.Януковичийн нам засгийн эрхэнд гарчээ. Гэвч оросуудын хувьд В.Янукович ч бас тийм хялбархан барж идэх “хоол” биш бололтой.
ОХУ-аас Европ руу нийлүүлдэг байгалийн хийн экспортын 80 орчим хувь нь Украйнаар дамжин өнгөрдөг. Гэхдээ Украйн улс өөрөө Оросын түүхий эдээс бүрэн хамааралтай орон юм. Украйны эрх баригчдын хувьд байгалийн хийг хэтэрхий үнэтэй худалдан авч байгаагаа анхааруулж, импортын үнээ бууруулах санал тавьсан. Гэвч Оросын Ерөнхийлөгч Дмитрий Медведев Украйныг Европын холбоонд нэгдэн орж, чөлөөт худалдааны бүс байгуулах гэрээг батлахгүй гэх болзол тавьж байгаа. Сүүлийн үед үе, үе яригдах болсон нэг асуудал бол Украйн Европын холбооны гишүүн орон болж магадгүй гэх. Хэрэв тэгвэл энэ нь Оросын хувьд Европын зах зээл рүү өндөр үнэтэй байгалийн хий нийлүүлэх боломжийг нь хязгаарлах юм. Өнгөрсөн онд үүнтэй холбоотой яриа хэлэлцээр хийх саналыг ОХУ-ын Ерөнхий сайд Владимир Путин мөн л тавьж байсан билээ.
Асуудлын гол нь үнэд байгаа юм биш. Оросын тал өндөр үнэтэй байгалийн хий нийлүүлэх замаар Украйныг хүнд байдалд оруулж, түүгээрээ дамжуулан евро бүс дэх Украйны нөлөөг бууруулж, дам утгаараа өөрийн хараат болгох зорилго тавьж байна.
Энэ бүхний эцэст украйнчууд Москвагаас тавьж буй саналыг тодорхой хэмжээнд хүлээж авахаас өөр аргагүй байдалд хүрч мэдэх юм. Тиймээс Европын холбооны шинжээчид үүнд нэлээд болгоомжилж байна. “Газпром” “Нафтогаз”-ын гол хувьцаа эзэмшигч болсон ч гэсэн украйнчууд юу ч үгүй хоосон хоцрохгүй. Тэд хариуд нь хямд бүтээгдэхүүн худалдан авахаас гадна “Нафтогаз”-ыг шинэчилж, техник, технологийг нь өөрчлөхөд зориулах санхүүгийн эх үүсвэртэй болох юм. Түүнчлэн “Нафтогаз” дахь Украйны Засгийн газрын мэдлийн хувьцааны хэмжээ ч өндөр хэвээр байна. Албаны шинжээчдийн тооцоолсноор энэ оны эцэс гэхэд Украйн Оросоос 40 тэрбум куб метр байгалийн хий импортолж авах аж. Харин 2011 оны эхний улиралд 1000 куб метр бүрийг нь 264 ам.доллараар үнэлж байсан бол дөрөвдүгээр улирлын байдлаар энэ үнэ өсч, 400 ам.доллар болсон байна. Үүнээс болж ирэх онд 27 тэрбум куб метр байгалийн хий худалдан авах боломжтой болжээ. Гэтэл украйнчуудын хэрэглээнд зориулж, дор хаяж 33 тэрбум куб метр байгалийн хий шаардагдана гэдгийг Украйны Эрчим хүчний сайд Юрий Бойко мэдэгдсэн байна.
Сүүлийн үед Оросын эрх баригчид шинэ хоолой байгуулах “Nord Stream” төслийг хэрэгжүүлж, бүтээн байгуулалтын ажлыг энэ онд дуусгахаар болсон. “Nord Stream”-ийн хоолой Балтын тэнгис доогуур үргэлжлэх бөгөөд Оросын Виборгоос Германы Greifswald хүрэх юм. Хэрэв энэ хоолой бүрэн ашиглалтад орвол түүгээр дамжуулж, 20 тэрбум куб метр хий тээвэрлэх боломжтой болно. Үүнээс болж Украйн улс Оросын байгалийн хийг тээвэрлэснийхээ хариуд жил бүр авдаг мөнгөнөөс 3-4 тэрбум ам.доллар нь үгүй болох юм. Өөрөөр хэлбэл, байгалийн хийн экспортоо Украйн, Европын холбооноос хараат бус болгох гэсэн оросуудын санаа хэрэгжиж эхлэхэд ойрхон байна.
"Улс төрийн тойм" сонин
![](https://news.mn/wp-content/archive2/biznes/photo/2010/5/c4715eeea1f5bf61/c22c7eda61376b00big.jpg)