Двайт “Супермэн” Ховард хамгийн авьяаслаг, нэр хүндтэй сагсан бөмбөгчдийн нэг. Атланта хотоос гаралтай, 211 см өндөртэй, булчинлаг бие хаатай түүнийг Аполло бурхны хөшөөний амилсан дүр гэх нь ч бий. Үлэмж биет залуу зогсоохын аргагүй хүчирхэг слам данк, хүүхдийн гэмээр сайхан инээмсэглэлээр өөрийн дүр төрхийг бүтээсэн. Талбайд ч, талбайн гадна ч хөгжилтэй байдаг түүнийг дэмжигчдийн тоо асар их болсныг 2009 оны Бүх оддын тоглолтын санал асуулга батлан харуулсан. Түүний төлөө 3,151,181 хүн санал өгсөн нь NBA-ын түүхэнд дээд амжилт тогтоосон билээ. Түүнээс өмнө Хятадын алдарт сагсан бөмбөгч Яао Мин 2005 оны Бүх оддын тоглолтод 2,558,278 хүний саналаар дээд амжилт тогтоож байсан юм. Ховард бол NBA-ын сүүлийн 10 жилд төрсөн хамгийн хүчтэй, бас сайхан сэтгэл хослуулсан тоглогч.