МУИС-ийн Мэдээллийн технологийн сургууль өчигдөр Өмнөд Солонгосын Чуннамын их сургуулийн аж үйлдвэр, судалгаа хамтын ажиллагааны сан болон тус улсын “ACS”  компанитай хамтран ажиллах гурван талт харилцан ойлголцлын санамж бичигт гарын үсэг зурлаа. Анх удаа гадны их сургууль болон хувийн компанитай хамтран ажиллах гурвалсан гэрээ үзэглэснээрээ онцлогтой энэхүү санамж бичгийн хүрээнд уул уурхайн машин механизмыг хянах систем боловсруулах төсөл хэрэгжих юм байна.

Мэдээллийн технологи болон электроникийн сүүлийн үеийн ололт амжилтад түшиглэн, wireless  буюу утасгүй технологи ашиглан хийгдэх төсөл амжилттай хэрэгжсэнээр уул уурхайн бүх төрлийн  машин механизмын өдөрт зарцуулсан түлшний хэмжээ, явсан зам, хурд, маршрут, тэр байтугай ямар ачаатай явж, хаана буулгасан гэдгийг нь хүртэл мэдэх  боломж бий болж байгаагаараа  минут секунд тутамд тасралтгүй гадагш урсч байгаа гзарын баялагтаа хяналт тавих, нөгөө талаар тухайн тээврийн хэрэгслийн аюулгүй ажиллагааг хангах ач холбогдолтой юм “ хэмээн төслийн багийнхан үзэж байна.

Хоёр их сургуулийн эрдэмтэд судалгааг нь хийж, Солонгостоо эмбеддэд систем хийж, суурилуулах чиглэлээр туршлагатай “ACS”  компани эрдэм шинжилгээний үр дүнг нь хэрэгжүүлэх энэхүү төсөл Өмнөд Солонгосын засгийн газрын санхүүжилтээр гурван жилийн хугацаатай хэрэгжих ажээ.