Италийн Сери А лигийн “Ювентус” клуб гол өрсөлдөгчдийн нэг болох “Рома”-гаас Монтенегро улсын шигшээ багийн довтлогч Мирко Вучиничийг бүрэлдэхүүндээ нэгтгэлээ.

Өдгөө 27 настай Вучинич Италийн нийслэл хотын баг 2005 оноос хойш тоглосон бөгөөд зуны солилцоогоор ийнхүү буурь сэлгэж, Турин хотын “Юве”-тэй дөрвөн жилийн хугацаатай гэрээ байгуулжээ. Өмнө нь “Лечче”-д хүчин зүтгэж байсан Вучинич “Би “Ювентус”-ын нэрийн өмнөөс тоглох болсондоо баярлаж, бас догдолж байна. “Рома” миний зүрх сэтгэлд байсан. Гэхдээ одоо бол өнгөрсөн асуудал” хэмээжээ.

“Ювентус” баг наймдугаар сарын 28-нд “Удинезе”-ийн талбайд зочлон тоглож, 2011-2012 оны улирлаа эхлүүлнэ.