Баяр наадмын үеэр “Нарантуул”, “Өгөөмөр” зах зэрэг томоохон худалдааны төвийн амралттай, замын хөдөлгөөний ачаалал бага байх үеийг тааруулж, Нарны замын доогуур үерийн ус зайлуулах хоолой тавих ажлыг хийх шийдвэрийг хотын дарга гаргасан билээ. Хариуцсан компаниуд ч замын ачаалал багатай үед ажлаа товлосон хугацаанд нь гүйцэтгэж, өнөөдөр өглөө Нарны замын хөдөлгөөнийг бүрэн нээлээ.

Төмөр зам доогуурх ус зайлуулах хоолойг төмөр замынхан гүйцэтгэсэн бол  Нарны замын шугам тавьсан хэсгийг өнөөдөртөө асфальдаж бэлэн болгох  аж. Мөн “Сүнжин гранд” зочид буудлын баруун талын даланг  урагш нь сэтэлж, зам доогуур гаргах хэсгийн ажлыг мөн өнөөдөр дуусгажээ. Эхний ээлжинд зам чөлөөлөх ажлыг хийж, нийтдээ 12,8 км далангийн шинэчлэлийн ажлыг аравдугаар сарын 1 гэхэд дуусгах юм байна.

Түүнчлэн өчигдөр орой  Metromall дэлгүүрийн уулзвараас Хүнсний 4-р дэлгүүрийн уулзвар хүртэлх 200 метр замын хөдөлгөөнийг  нээж, үргэлжлүүлээд  Хүнсний 4-р дэлгүүрийн уулзвараас ШУТИС-ийн уулзвар хүртэлх 600 метр замыг энэ сарын 27-ныг хүртэл хаагаад байна.