Баян-Өлгий аймгаас сонгогдсон
УИХ-ын  гишүүн А.Тлейханы  туслах Ш.Айдас нарын гурван хүнд холбогдох хэргийн анхан
шатны шүүх хурал өнөөдөр Сүхбаатар дүүргийн шүүхэд  эхлэх гэж байна. Тэдэнд эрүүгийн хуулийн 233.1 дэх хэсэгт зааснаар хуурамч баримт бичиг, тамга,
тэмдэг, хэвлэмэл маягт үйлдэх, ашигласан, 148.2 дахь хэсэгт
зааснаар бусдын эд хөрөнгийг залилан мэхэлж
авсан гэх үндэслэлээр эрүүгийн хэрэг үүсгэжээ. Тэдэнд холбогдох хэрэг өнгөрсөн оны
арванхоёрдугаар сараас эхлэн
шалгагдаж эхэлсэн юм. УИХ-ын гишүүн А.Тлейханы туслах Ш.Айдос гэгч гишүүнийхээ нэрийг барьж
олон хүнийг хуурч мөнгө аваад зогсохгүй Монгол Улсын төрийн тэргүүний нэрийг барьж залилан хийх гэмт хэргийг үйлджээ. Тэрбээр Ерөнхийлөгч
Ц.Элбэгдоржийн нэрийн өмнөөс хуурамч тамга тэмдгийг нь дууриалган үйлдсэн хуурамч
албан бичиг илгээсэн аж. Ингэхдээ Ерөнхийлөгчийн гаргасан зарлигийг ч ашигласан байна. Ш.Айдас нь өмнө нь УИХ-ын гишүүнийхээ нэрийг ашиглан Баян-Өлгий аймгийн иргэдийг Солонгос улс руу гаргаж өгнө хэмээн залилж
байжээ.

Хэрэв шүүхээр гэм буруутай тогтоогдвол бусдын эд хөрөнгийг залилах гэмт
хэргийг давтан үйлдсэн, бүлэглэж буюу урьдчилан үгсэн  тохиролцсон, албан
тушаалын байдлаа ашиглаж үйлдсэн, энэ хэргийн улмаас үлэмж хэмжээний хохирол учирсан гэх үндэслэлээр эд хөрөнгийг
хураах буюу хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй
тэнцэх хэмжээний төгрөгөөр торгох, гурваас дээш зургаан сар хүртэл хугацаагаар
баривчлах, эсхүл хоёроос таван жил хүртэл хугацаагаар хорих ял шийтгэх заалттай. Мөн аж ахуйн нэгж, байгууллагаас эрх олгосон, үүргээс чөлөөлсөн баримт
бичиг, түүнчлэн тамга, тэмдэг, хэвлэмэл маягт, иргэний үнэмлэх,
гадаад паспорт, хувийн бусад баримт бичгийг ашиглах буюу бусдад ашиглуулах
зорилгоор хуурамчаар үйлдсэн, ашигласан, борлуулсан бол хөдөлмөрийн хөлсний доод
хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ гэж заажээ. Шүүх хуралд Улсын яллагч
М.Дэлгэрнасан, өмгөөлөгчөөр  Ц.Монгол, Ж.Тэгшжаргал, н.Дашдулам, Ч.Ням,
До.Батсүх нар оролцож
байгаа  бол шүүх хурлыг М.Алдар даргалж
байна.

С.Отгон