Хөдөлгөөнт эргүүлийн цагдаа хүн дайрч гэмтээсэн хэрэг өнгөрөгч баасан гаригийн 12.00 цагийн үед  Сонгинохайрхан дүүргийн нутаг Драгон төвийн урд замд гарсан. Гэвч тухайн үед дуудлагаар ирсэн 103-ын эмч “Газар дээрээ нас барсан  байна” гэх онош тавиад явсан аж. Харин гурван цагийн  дараа Прокурорын дэргэдэх мөрдөн байцаах газрын ажилтнууд ирээд осолд өртсөн Э-г амьсгалж байна гэснээр гэмтлийн эмнэлэгт хүргэсэн байна. Хохирогчийн биеийн зүүн тал бүхэлдээ гэмтэлтэй, дотуур цус алдалттай, Гэмтлийн эмнэлгийн Эрчимт эмчилгээний тасагт хэвтэж байгаа юм. Өнөөдөр тус эмнэлгийг зорин очиход хохирогчийг эхнэр н.Цэндсүрэн нь сахиж байсан юм. Түүнээс цөөн асуултад хариулт авлаа.

-Нөхрийн тань бие сайжирч байна уу?

-Одоогоор сайжирсан юм алга. Ухаан ороогүй байна. Нэлээд хүнд бэртэлтэй гэсэн. Маргааш хагалгаанд орж магадгүй. Гэхдээ эмч нар найдваргүй байж магадгүй  гэсэн.

-Осол болсон газарт очсон уу. Танай нөхөр яаж яваад осолдсон юм бол?

-Очиж үзээгүй ээ. Явган  зорчигчийн буруу байсан гэх юм сонсогдсон. Гэхдээ миний нөхөрт 103-ийн эмч нар тухайн үед нь тусламж үзүүлсэн бол ийм юм болохгүй байсан болов уу. Одоо амьд гарах магадлал бага гэсэн. Осол болсноос хойш гурван цагийн дараа эмнэлэгт авчирсан шүү дээ. Эмч нарын буруугаас болж хожимдож эмнэлэгт хүргэсэнд харамсч байна гэв.

Одоогоор осол хэний буруугаас гарсан нь тодорхойгүй байна. Замын цагдаагийн  газраас сарын хугацаанд ослын шалтгааныг эцэслэн гаргадаг аж.