УИХ-ын Төсвийн байнгын хорооны хуралдаанаар Хадгаламж зээлийн хоршооны тухай хуульд нэмэлт, өөрчлөлт оруулах тухай  хуулийн төслийг хэлэлцсэн юм. Түүнд Хадгаламж зээлийн хоршоод нь ашгийн бус байгууллага тул татвараас чөлөөлж, харин гишүүдээс татвар авдаг байхаар зохицуулахаар тусгажээ. Хэлэлцүүлгийн үеэр гишүүн Ц.Сэдванчиг уг төслийн хэлэлцүүлгийг хойшлуулах санал гаргасан юм. Гишүүн Д.Дамба-Очир “татвартай холбоотой хуулиудыг хувь гишүүд барьж оруулж ирэх биш зөвхөн Засгийн газраар оруулж ирж байя гэж өмнө ярилцсан. Түүгээрээ л болъё.

Сангийн сайд ч татвартай холбоотой хуулийг Засгийн газар оруулж байя гэсэн тул буцаая”  хэмээн түүнтэй санал нэгдсэн юм. Ч.Улаан гишүүн ч тэдэнтэй санал нийлж “Татвартай холбоотой хуулийг янз бүрийн субъект өргөн барихыг хориглох ёстой. Ялангуяа сонгууль болохоос нэг жилийн өмнөөс эхлэн татварын хөнгөлөлттэй холбоотой элдэв асуудлыг хэлэлцэхээс татгалзъя. Хадгаламж зээлийн хоршооны тухай хуульд нэмэлт, өөрчлөлт оруулах тухай  хуулийн төслийг буцаах юм уу хойшлуулъя. Эсвэл татвартай холбоотой хэсгийг орхиод бусдыг хэлэлцье. Тэгэхгүй бол УИХ-ын нэр хүндэд ч, гишүүдийн нэрд ч муу”” гэж байв. Сонгууль дөхөхөөр тодорхой хэсгийн татварыг хөнгөлж төсөвт дарамт учруулдаггүй байх ёстой гэж дийлэнх гишүүн үзсэн юм.

Улмаар УИХ-ын Төсөв, Эдийн засгийн байнгын хороод хамтарч ажлын хэсэг гаргаж хэлэлцэхээр болж асуудлыг хойшлууллаа.