Манай улсын замууд хүнд даацын машинд зориулагдаагүй учраас тэдгээр машиныг хотын төвд хөдөлгөөнд оруулсанаас үүдэн зам эвдэрч, гэмтэх нь ихэссэн юм. Үүнтэй уялдуулан хэдэн тоннын даацтай тээврийн хэрэгсэл нийслэлийн хөдөлгөөнд оролцохыг тодорхойлон замын техник ашиглалтын түвшинг тогтоожээ. Улаанбаатар хотын хэмжээнд 450 гаруй км хатуу хучилттай зам байдаг. Харин Нийслэлийн замаар зорчих тээврийн хэрэгслийн тоо эрс нэмэгдэж 168.8 мянгад хүрч, улсын хэмжээнд бүртгэлтэй тээврийн хэрэгслийн тэн хагас нь Улаанбаатар хотын замын хөдөлгөөнд оролцох болсон. 20 тонноос дээш ачааны автомашин 16396 мянга байдаг гэсэн судалгаа бий. Дээр нь нийслэлд түр хугацаатай ирж замын хөдөлгөөнд оролцож буй ачааны автомашинууд байна.

Ачааллыг багасгах үүднээс тухайн машины нэг тэнхлэгт ногдох хүндийн жинг харгалзан хөдөлгөөнд оруулахаар болсон ажээ. Нийслэл төдийгүй орон нутагт байх бүх замуудад нэг тэнхлэгт ногдох хүндийн жинг долоон тонноор тогтоож хязгаарлажээ. Хүнд даацын авто машин зам барилга, уул уурхайн замаараа хөдөлгөөнд оролцох боломжтой.  Харин нийтийн эзэмшлийн зам талбайгааар зорчихгүй болжээ. Саяхнаас эхлэн бүх товчоод дээр тээврийн хэрэгслийн даацыг хязгаарласан тэмдэг тэмдэглэгээ тавьсан гэнэ. Тодорхой постууд дээр Автозамын газар, МХЕГ-ын байцаагч нар ажиллаж тээврийн хэрэгслийн даацыг шалгаад тухайн машины хүндийн жин тогтоосон жингээс илүү бол хөдөлгөөнд оролцуулахгүй байхаар болжээ. Улсын чанартай автозамуудад нэг тэнхлэгт оногдох хүндийн жинг зааж өгсөн болохоор орон нутагт ч гэсэн адилхан хяналт тавихаар төлөвлөсөн байна.