УИХ дахь МАН-ын бүлэг өчигд­рийн хуралдааны эцэст УИХ дахь Ардчилсан намын бүлэг болон бу­сад намтай хэлэлцээр хийх ажлын хэс­гийг УИХ-ын гишүүн Н.Энхболд, Д.Лүндээжанцан, Ц.Даваасүрэн, Ж.Сүхбаатар, Ч.Хүрэлбаатар на­рын таван хүний бүрэлдэхүүнтэй бай­гуул­сан байна. 

Мэдээж ийнхүү ажлын хэсэг бай­гуулахын тулд “тогоон дотроо” сон­гуу­лийн ямар хувилбарыг эцсийн байд­лаар сонгохоо шийджээ.

Уг хуралдааны эхэнд Хувь хүний орлогын албан татварын тухай хуульд нэмэлт оруулах тухай хуулийн төсөл, Аж ахуйн нэгжийн орлогын албан татварын тухай хуульд нэмэлт оруулах тухай хуулийн төслийг хэлэлцжээ. Уг хуулийн төслийн хүрээнд орлого багатай иргэдийг Хүн амын орлогын албан татвараас чөлөөлөх, алслагдсан бүс нутагт үйлдвэрлэл эрхэлж буй иргэн, аж ахуйн нэгжийг Аж ахуйн орлогын албан татвараас чөлөөлөх нь зүйтэй гэх санааг дэвшүүлжээ. Алслагдсан бүс нутагт үйлдвэр хөгжүүлэхэд ийм хөнгөлөлт ихээхэн тустай хэмээн бүл­гийн гишүүд үзсэн байна. Мөн энэ асуудалтай холбоотойгоор судалгаа, боловс­руулалт хийх ажлын хэсэг бай­гуу­лан ажиллахаар болсон аж.

Намын бүлгээс байгуулагдах уг ажлын хэсэг нь хаврын чуулган зав­сар­лахаас өмнө хуульд зарим өөрч­лөлтүүдийг хийх, амжаагүй үлдсэ­нийг нь  завсарлагааны хугацаанд бо­ловс­­руулан УИХ-ын намрын чуул­ганаар батлуулах төлөвлөгөөг баримт­лан ажиллахаар болсон байна. Алслагдсан бүс нутагт үйлчлэх уг дэмжлэгт мөн хамаарахгүй үйлдвэр­лэлийг тодорхойлсон нь  архи, тамхи үйлдвэрлэгчид болон ашигт малтмалын чиглэлээр үйл ажиллагаа явуулж байгаа компаниудыг хамааруулахгүй байхаар болсон байна.

Энэ өдрийн бүлгийн хуралдааны хамгийн анхаарал татаж байсан асуу­дал нь сонгуулийн тогтолцоог ямар харьцаатай байх талаар бүлгийн албан ёсны байр суурийг илэрхийлсэн явдал байлаа. Бүлгийн гишүүд УИХ-ын Сон­­гуулийн тухай хуулийн төслийн тогтолцооноос бусад асуудлыг хэ­лэл­цээд үндсэнд нь дууссантай холбоо­тойгоор ямар тогтолцоо байх ёстой талаар үгээ хэлэх цаг нь ирсэн гэж үзжээ. Бүлгийн дарга Д.Лүндээжанцан “МАН-ын Удирдах зөвлөлөөс мажоритар давамгайлсан холимог тогтолцоогоор сонгуулийг явуулах нь зүйтэй гэсэн чиглэл гарсны дагуу бүлгийн гишүүд дэмжсэн” гэдгийг уламжлав. 

Мажоритар давамгайлсан тогтол­цоог ярих үеэр 52:24, 50:26 гэх хоёр янзын хувилбар гарч ирснээс 50:26-ийг сонгохыг гишүүдийн олонх дэмжсэн аж.

Түүнчлэн батлан гаргах хуулиа Үндсэн хуультай нийцүүлэх шаард­лагаар нэр дэвшигчийн  нэрийг дугуй­лах ёстой гэдгийг бүлгээс  санал болго­сон байна.