Японы цөмийн аюул нэмэгдэхийн
зэрэгцээ экспортын хэмжээ буурсан үзүүлэлт гарсан байна.
Экспортын хэмжээ өнгөрсөн жилийнхээс 10.3 хувиар
буурсан гэж тус улсын Сангийн
сайд мэдэгджээ. Харин ажиглагчид экспортын бууралт 8.4 хувьтай байна гэж
таамаглаж байсан билээ.

Эрчим хүчний хангамж буурч, үйлдвэрүүдийн туслах эд ангийн нийлүүлэлт зогсонги байдалд
орсноос Японы  үйлдвэрүүд хаагдаж, гадаад худалдааны
хэмжээ эрс буурсан юм. Харин импортын хэмжээ сүүлийн хоёр сарын турш өссөөр байгаа нь худалдааны тэнцвэрт байдлыг алдагдуулж байгаа ажээ.

"Японы эдийн
засаг урьд байгаагүйгээр доройтсоныг статистик харуулж байгаа боловч гамшгийн дараах сэргээн
босголт хямралыг намжаана” гэж Норинчукин судалгааны институтын ахлах эдийн засагч ярьжээ.  Японы автомашины экспорт л гэхэд өнгөрсөн жилийн мөн үеийнхээс 38.9 хувиар буурсан үзүүлэлт гарчээ. Хямрал хөлөг онгоц, автомашин болон
цахилгаан хэрэгслийн үйлдвэрт ч мөн нөлөөлж байгаа ажээ.

Японы гадаад
худалдааны алдагдал 853.7
тэрбум иен буюу 10.6 тэрбум
ам.долларт хүрсэн гэж тус улсын сангийн сайд мэдэгдсэн байна.

Н.Энх