Хятадын өмнөд хэсэгт үерийн улмаас 105 хүн ор сураггүй алга болж, 60 гаруй хүн амиа алдсан нь тогтоогдоод байгаа тухай Синьхуа агентлагаас даваа гаригт мэдээлжээ. Цаашид Хятадын төв болон өмнөд хэсгээр дахин их хэмжээний хур бороо орох төлөвтэй байгаа тул болзошгүй гамшигтай тэмцэхээр Хятадын Иргэний хэрэг эрхэлсэн яам болон Гамшгийн хохирлыг барагдуулах үндэсний комисс хамтарч яаралтай арга хэмжээнүүдийг шат дараатайгаар авч эхлээд байна.

Даваа гаригийн өглөөний байдлаар амь үрэгдсэн болон сураггүй алга болсон иргэдийг мужаар нь хуваан авч үзвэл, Хунань мужид 39 хүн үрэгдэж, 21 хүн сураггүй болсон, Хубей мужид 29 хүн амиа алдаж, 10 хүн сураггүй болсон байна. Түүнчлэн Гүижоу мужид 24 хүн амь эрсдэж, 32 хүн алга болсон, Жяньси мужид 13 хүн амиа алдсан байдалтай байгаа аж. Одоогийн байдлаар бороо зүсэрч, цаашид үргэлжлэн орох хандлагатай байгаа 11 муж, долоон хотод яаралтай тусламжийн цэгүүдийг байгуулаад байгаа ба орон нутгийн иргэний хэрэг эрхэлсэн газрууд түр хоргодох байрнуудыг байгуулж, онцгой байдлын төлөвлөгөөг эцсийн байдлаар боловсруулан баталж, иргэдийг аюултай бүсээс нүүлгэн шилжүүлэх ажлуудыг зохион байгуулж байна.