Mонголын Урлагийн зөвлөл, БНСУ-ын урлагийн зөвлөлтэй хамтран дөрөв дэх жилдээ зохион байгуулж буй “Цаг хугацаа ба орон зай” нүүдлийн урлан 2011 хөтөлбөрийн сонгон шалгаруулалт эхэллээ. Уг арга хэмжээнд БНСУ болон Монголын тус бүр зургаан уран бүтээлчийг шалгаруулж, оролцуулах юм. Оролцохыг хүссэн уран бүтээлчид долдугаар сарын 31-ний дотор өргөдлөө Mонголын Урлагийн зөвлөлд ирүүлэх ёстой. Өмнөд Солонгосын Урлагийн зөвлөл, МУЗ-ийн Уран бүтээлчдийг дэмжих хөтөлбөрийн хороо, удирдах зөвлөлийн гишүүд, ажилчдаас бүрдсэн сонгон шалгаруулах хороо сонгон шалгаруулалтыг хийж,  ирэх наймдугаар сарын 27-нд эцсийн дүнг зарлан зургаан уран бүтээлчийг шалгаруулах юм байна.

Хоёр орны уран бүтээлчид Өмнөговь аймгаар аялж, уран бүтээлээ туурвин, бие биенээсээ суралцан, бүтээлээрээ хамтран үзэсгэлэн гаргаж, урлагийн нийгэм болон орон нутгийн хөгжилд оруулах хувь нэмрийг нэмэгдүүлэхэд “Цаг хугацаа ба орон зай” нүүдлийн урлан-2011 хөтөлбөрийн зорилго оршино.

Дүрслэх урлаг, орчин үеийн урлаг буюу инстоляци, дизайн, фото зураг, уран зохиол чиглэлээр ажилладаг мэргэжлийн уран бүтээлчдээс шалгарсан баг ирэх наймдугаар сарын 24-нөөс есдүгээр сарын 7 хүртэл Өмнөговь аймгийн Говь гурван сайханы байгалийн цогцолборт газар, Хонгорын элс орчимд байрлан уран бүтээлээ туурвих гэнэ. Нүүдлийн урланд бүтээсэн бүтээлүүдийг тус аймгийн музей болон Улаанбаатар хотноо дэлгэж үзэгчдийн хүртээл болгохоор төлөвлөөд байгаа аж.